भरधाव कारने दिलेल्या धडकेत 53 वर्षीय सुरक्षा रक्षाचा मृत्यू झाला आहे. सोमवारी (दि.12) रात्री 8.45 वाजता ही घटना घडली. अपघातात या इसमाचा पाय मोडला, उपचारासाठी त्यांना म्हापसा येथे रूग्णालयात घेऊन जात असताना, रस्त्यातच त्यांचा मृत्यू झाला.

अनिल कांता सिंग (वय 53) असे या अपघातात मृत्यू झालेल्या सुरक्षा रक्षकाचे नाव आहे. अनिल हे अँथनीवाडा- गिरी येथील रहिवासी आहेत.

याप्रकरणी पोलिसांनी कारचालक संशयित रमेश बरड (वय 35, रा. आगशी) याला अटक केली आहे.

म्हापसा पोलिसांनी दिलेल्या माहितीनुसार, अनिल सिंग बसमधून उतरल्यानंतर गिरी महामार्गावरून रस्ता ओलांडत होते. त्यावेळी वेगाने येणाऱ्या एका कारने (जीए 07 एन 5138) त्यांना जोराची धडक दिली. यात अनिल यांचा पाय मोडला. तसेच, पोटाला देखील जखम झाली.

जखमी अनिल यांना रूग्णवाहिकेतून म्हापसा येथील रूग्णालयात उपचारासाठी नेले, मात्र वाटेतच त्यांचा मृत्यू झाला. म्हापसा पोलिस अधिक तपास करीत आहेत.