Ponda News: मुस्लिम बांधवांचा बकरी ईद सण 29 जून रोजी साजरा होत आहे. त्या पार्श्वभुमीवर कोणताही अनुचित प्रकार घडू नये, याकरिता फोंड्यातील उसगाव येथील कत्तलखाना परिसरात चार दिवसांसाठी जमावबंदी कलम लागू करण्यात आले आहे.

दक्षिण गोव्याचे जिल्हाधिकारी अश्विन चंद्रू ए. यांनी याबाबतचे आदेश काढले आहेत.

त्यानुसार या काळात 4 पेक्षा अधिक लोकांना एकत्र येण्यावर बंधने असतील. या कत्तलखान्याच्या कंपाऊंडपासून एक किलोमीटर परिघात हा आदेश लागू असणार आहे. 28 जूनच्या मध्यरात्रीपासून हा आदेश लागू होणार आहे. तो 2 जुलैपर्यंत लागू असेल.

जर कुणी या आदेशाचा भंग केला तर त्याच्यावर कायदेशीर कारवाई करण्यात येईल, असे या आदेशात म्हटले आहे.

गेल्या काही काळामध्ये या कत्तलखान्याजवळ जमून काही लोकांनी कत्तलीला विरोध केल्याचे प्रकार घडले आहेत. त्यातून सणउत्सव काळात सामाजिक शांततेला बाधा पोहचू नये, म्हणून हा आदेश जारी करण्यात आला आहे.