Goa Science Centre: ‘सायन्स फिएस्टा - 2024’ या नावाने तीन दिवसीय विज्ञानावर आधारित मेगा इव्हेंट सोमवार 26 फेब्रुवारीपासून मिरामार येथे सायन्स सेंटर येथे होणार असून तो 28 फेब्रुवारीपर्यंत चालणार आहे. या तीन दिवसांत विद्यार्थी आणि सर्वसामान्यांना शास्त्रज्ञ, संशोधन अभ्यासक यांच्याशी संवाद साधण्याची संधी मिळेल.

तसेच विविध प्रात्यक्षिके, प्रश्नमंजूषा, स्पर्धा आणि कार्यशाळेत सहभागी होण्याची संधी मिळणार आहे.

पहिल्या दिवशी विविध विज्ञान आधारित प्रयोगांबाबत संवादात्मक सत्र आणि प्रात्यक्षिके होणार आहेत. लिक्विड नायट्रोजन शो, रोबोटिक्सचे प्रात्यक्षिक अशा अनेक गोष्टी यात असतील. दुसऱ्या दिवशी इस्रोच्या शास्त्रज्ञासोबत आणखी एक संवादात्मक सत्र होईल, त्यानंतर चित्रकला स्पर्धा, कार्यशाळा आशा वेगवेगळ्या उपक्रमांबाबत विद्यार्थ्यांना मार्गदर्शन करण्यात येणार आहे.

या कार्यक्रमाच्या शेवटच्या दिवशी ड्राय आइस शो, स्पेस क्विझ, अन्न भेसळीवर कार्यशाळा आणि शास्त्रज्ञ आणि संशोधक विद्वानांशी संवादी सत्र होईल.

पुढे समाप्ती सत्रात, गोवा राज्य न्यायवैद्यक विज्ञान प्रयोगशाळा गोवा पोलिस विभागाचे संचालक डॉ. एन. पी. वाघमारे यांच्या हस्ते पारितोषिक वितरण होणार आहे. हा कार्यक्रम विद्यार्थ्यांसाठी आणि सर्वांसाठी खुला आहे.

उद्‍घाटनाला मार्टिन्स,उमेश कुमार रुस्तगी

गोवा विज्ञान केंद्र मिरामारच्या सूत्राने सांगितले की, सोमवारी सकाळी ‘सायन्स फिएस्टा - २०२४’ इव्हेंटचे उद्‍घाटन गोवा विज्ञान आणि तंत्रज्ञान विभागाचे संचालक लेव्हिन्सन मार्टिन्स आणि नेहरू विज्ञान केंद्र मुंबईचे संचालक उमेश कुमार रुस्तगी यांच्या उपस्थितीत होणार आहे.