Goa Paragliding Accident Viral Video

पणजी: गोव्यात पॅराग्लायडिंग करताना दोरी अचानक तुटल्याने पुण्यातील पर्यटक तरुणी आणि नेपाळच्या पायलटचा मृत्यू झाल्याची घटना रविवारी उघडकीस आली. या घटनेचा व्हिडिओ आता समोर आला आहे. केरी (पेडणे) येथे समुद्रकिनारी डोंगर भागातून पॅराग्लायडिंग करताना अचानक दोरी तुटल्यामुळे हा अपघात झाला होता.

केरी येथे झालेल्या अपघातात पुण्यातील पर्यटक युवती शिवानी दाभळे (वय २६ वर्षे) आणि पॅराग्लायडरचा पायलट सुमन नेपाळी (वय २५ वर्षे) हे दोघे ठार झाले होते. यामुळे राज्यातील पॅराग्लायडिंग व्यावसायावर प्रश्नचिन्ह उपस्थित केले जात असाताना हा अपघात नेमका झाला कसा? याचा काळजा ठोका चुकवणारा व्हिडिओ समोर आला आहे.

मृत शिवानी तिच्या पतीसोबत हनिमूनसाठी गोव्यात आली होती, असा दावा केला जात आहे. पॅराग्लायडिंग करण्यासाठी केरी डोंगरावरील व्यावसायिकांकडे ते गेले होते. यावेळी पायलट सुमन नेपाळी आणि पुणे येथील पर्यटक शिवानी दाभळे हे दोघे पॅराग्लायडिंग करत असताना अचानक पॅराग्लायडरची एक दोरी तुटल्यामुळे थेट डोंगरावर पडून दोघेही ठार झाले, अशी माहिती पोलिसांनी दिलीय.

दरम्यान, हरमल तसेच केरी भागात बेकायदेशीररित्या पॅराग्लायडिंगचा व्यवसाय केला जात असल्याचे उघडकीस आले आहे. याप्रकरणी स्थानिकांनी तीव्र प्रतिक्रिया व्यक्त केल्या आहेत. पॅराग्लायडिंगला आमचा विरोध असून तशा प्रकारचा ठराव मंजूर करूनही सरकारने अशा पॅराग्लायडिंग व्यवसायिकांना परवाने का दिले? कुणाला परवाने दिले? याची सविस्तर माहिती सरकारने जाहीर करावी, अशी मागणी स्थानिक करत आहेत.