Goa Politics: पुढील वर्षी होणाऱ्या लोकसभा निवडणुकीचे वारे हळूहळू तापू लागले आहे. उत्तर गोवा लोकसभा मतदारसंघातून इच्छुक उमेदवारांनी मोर्चेबांधणीही सुरू केली असून चूरसही वाढू लागली आहे.

या मतदारसंघातून लोकसभेसाठी उमेदवार म्हणून माजी आमदार नरेश सावळ यांचे नाव पुढे येत असून, डिचोलीसह मतदारसंघातील काही विधानसभा मतदारसंघात त्यांच्या नावाची जोरदार चर्चाही सुरू आहे.

त्यातच त्यांच्या फोटोसह गणेश चतुर्थीनिमित्त शुभेच्छा देणारे बॅनर विविध ठिकाणी झळकल्याने या चर्चेला महत्त्व तेवढेच वजन प्राप्त झाले आहे.

दुसऱ्या बाजूने कार्यकर्त्यांचा आग्रह आणि एखाद्या पक्षाची उमेदवारी मिळाल्यास आपण लोकसभा निवडणुकीच्या रिंगणात नक्कीच उतरणार, अशी ''सिंहगर्जना'' नरेश सावळ यांनी केली आहे.

गेल्या विधानसभा निवडणुकीत अवघ्याच मतांनी विजयश्रीने हुलकावणी दिल्यानंतर नरेश सावळ यांचे अंतर्गत कार्य चालूच होते. प्रत्यक्षात मात्र ते राजकारणापासून काहीसे अलिप्त होते.

भाजप की काँग्रेस?

उत्तर गोवा लोकसभा मतदारसंघ हा अजूनतरी भाजपसाठी सुरक्षित आणि अनुकूल आहे. गेल्या पाच लोकसभा निवडणुकीपासून या मतदारसंघावर भाजपचे निर्विवाद वर्चस्व आहे.

विद्यमान केंद्रीयमंत्री श्रीपाद (भाऊ) नाईक हे या मतदारसंघातून सलग पाचवेळा निवडून आले आहे.

यावेळी लोकसभेसाठी उमेदवार म्हणून ज्यांच्या नावाची चर्चा सुरू होती, ते सदानंद शेट तानावडे हे खासदार म्हणून राज्यसभेवर निवडून गेले आहेत. त्यामुळे श्रीपाद नाईक यांचा लोकसभा निवडणूक लढविण्याचा मार्ग मोकळा झाला आहे.

आता नरेश सावळ यांचे नाव चर्चेत आल्याने त्यांना भाजपची उमेदवारी मिळणार, की ते काँग्रेस पक्षाचे उमेदवार म्हणून रिंगणात उतरणार. त्याबद्दल उलटसुलट चर्चाही सुरू झाली आहे.

राजकीय कारकीर्द

2012 साली झालेल्या विधानसभा निवडणुकीत नरेश सावळ हे प्रथमच डिचोलीतून अपक्ष आमदार म्हणून विधानसभेत गेले. २०१७ आणि २०२२ साली मिळून झालेल्या दोन्ही विधानसभा निवडणुकीत नरेश सावळ यांनी मगोच्या उमेदवारीवर डिचोली मतदारसंघातून निवडणूक लढवली होती.

मात्र दोन्ही निवडणुकीत त्यांना विजयाने हुलकावणी दिली होती. दोन्ही निवडणुकीत त्यांना अवघ्याच मतांनी हार पत्करावी लागली होती.