मडगाव: करमणे - सावर्डे येथील रूपा पारकर या महिलेच्या खूनप्रकरणी अद्याप आरोप निश्चित करणे बाकी आहे. तसेच साक्षीदारांचा न्यायालयात जबाब नोंदवणे आवश्यक आहे. याशिवाय तपास यंत्रणेने गोळा केलेल्या पुराव्याची दखल घेतल्यास निर्दयीपणे हत्या करण्यात आली. तसेच अपराधी सापडू नये म्हणून मृतदेहाची विल्हेवाट लावण्यात आल्याचे निरीक्षण नोंदवून गोवास्थित मुंबई उच्च न्यायालयाने संशयित हुसेन खान याचा जामीन फेटाळून लावला. याबाबतचा निवाडा न्यायमूर्ती भारत देशपांडे यांनी दिला आहे.

या प्रकरणी कुडचडे पोलिसांनी ६ मे २०२२ रोजी गुन्हा दाखल केला. त्यानुसार गुड्डेमळ - सावर्डे येथील रस्त्याच्या बाजूला जंगलात एका महिलेचा मृतदेह आढळून आला होता. मृतदेह करमणे - सावर्डे येथील रुपा पारकर हिचा असल्याचे समोर आले. त्यानंतर पोलिसांनी खुनाचा गुन्हा नोंद करून तपास सुरू केला.

याच दरम्यान पोलिसांनी परिसरातील सीसीटीव्ही तसेच साक्षीदारांचा जबाब नोंद करून १४ मे २०२२ रोजी संशयित हुसेन खान या ट्रकचालकाला अटक केली होती. संशयित हुसेन खान याने दक्षिण गोवा जिल्हा व सत्र न्यायालयात जामीन अर्ज केला असता, न्यायालयाने तो फेटाळून लावला. त्यानंतर संशयिताने गोवास्थित मुंबई उच्च न्यायालयात जामीन अर्ज दाखल केला. न्यायालयाने वरील निरीक्षण नोंदवून जामीन अर्ज फेटाळून लावला.