फोंडा: सावईवेरे कोमुनिदादच्या जमिनीतील पाच घरांचा प्रश्‍न न्यायप्रविष्ट असून ही घरे पाडण्याचा आदेश फोंड्याच्या दिवाणी न्यायालयाने दिला आहे. तरीपण मुख्यमंत्री डॉ. प्रमोद सावंत यांना कुणी तरी चुकीची माहिती दिली असून आम्ही कुणाच्या हिताआड नाही, पण बेकायदेशीर घरे बांधणाऱ्यांनी कायदेशीर सोपस्कार पूर्ण करणे तेवढेच गरजेचे आहे, असे सावईवेरे कोमुनिदादच्या पदाधिकाऱ्यांनी फोंड्यात घेतलेल्या पत्रकार परिषदेत स्पष्ट केले.

मुख्यमंत्री प्रमोद सावंत यांचा आम्ही आदर करतो, पण त्यांना सावईवेरे येथील बेकायदेशीर घरांसंबंधी योग्य माहिती दिलेली नाही. गेल्या १९९२ पासून या बेकायदा घरांचा प्रश्‍न न्यायालयात आहे. आता त्यावर निकालही आला आहे.

त्यामुळे आम्ही न्यायालयाचाही आदर करतो, असे कोमुनिदादच्या पदाधिकाऱ्यांनी सांगितले. सावईवेरे कोमुनिदादतर्फे सामाजिक कार्यासाठी पंचायत तसेच इतरांनाही जमीन दिली असल्याचे यावेळी सांगण्यात आले.

यावेळी सावईवेरे कोमुनिदादचे ॲटर्नी पंढरीनाथ चाफाडकर, अध्यक्ष एकनाथ सावईकर, खजिनदार विजयकुमार सावईकर तसेच सुभाष शिलकर व नारायण म्हातारभोग, हेमंत कथने आदी पदाधिकारी उपस्थित होते.