वाळपई: सत्तरी तालुक्यात शिमगोत्सवाला सुरुवात झाली आहे. काल रात्री होळी घालून उत्सवाला प्रारंभ करण्यात आला. सत्तरीत नगरगावात आंबेडे, धावे, उस्ते, बांबर, नानोडा, कोदाळ, ब्रम्हाकरमळी, हेदोडे आदी गावात शिमगोत्सव शेकडो वर्षापासून साजरा केला जातो आहे. नगरगाव भागात शिगमोत्सव यामध्ये करवल्या हा विशेष आकर्षणाचा केंद्रबिंदू ठरत आलेला आहे. गुरुवारी रात्री होळी गावच्या मंदिराबाहेर अनेक गावात घालण्यात आली. यावेळी तरुणांचा मोठा उत्साह होता.

शुक्रवारी चोर हा खेळ खेळण्यात आला. त्यात लहान मुलांना विशेष रुपात पाठीवर पानांचे साधन बांधून, तोंडाला काळा रंग फासवून हे चोर प्रत्येकाच्या घरी गेले. सत्तरीत विविध ठिकाणी येथे घरोघरी चोर गेले. त्यावेळी लोकांनी चोरांची मोठ्या भक्तीभावाने विधीवत पूजा केली. सत्तरीत शिमगोत्सवाचे वातावरण तयार झाले असून पुढील सात दिवस वेगवेगळ्या पारंपारिक उत्सवाच्या माध्यमातून शिगमोत्सवात आनंदाचे वातावरण पहावयास मिळणार आहे.

काही गावातील नागरिक देवाची राय या नैसर्गिक संपत्ती मधून विशिष्ट प्रकारच्या झाडांची होळी आणून पुजलेली आहे. तर काही गावातील लोक जंगलामधील आंब्याची नामक झाडाची निवड करुन होळी साजरी केली आहे. होळी झाल्यानंतर रोमाट साजरे करणे हासुद्धा शिगमोत्सवातील एक विशिष्ट असा प्रकार आहे.

पुढील सात दिवस रोमटामेळ खेळ खेलले जाणार आहेत.. प्रत्येक गावांमध्ये पारंपारिक पध्दतीने हा उत्सव साजरा केला जात आहे. बालगोपाळ यापासून ते आबालवृद्ध पर्यंत या रोमटामेळ प्रक्रियेत सहभागी झाले आहेत. ढोल-ताशांचा गजर व बेभान होऊन नाचणे हा यारोमाट या प्रक्रियेतील महत्त्वाचा भाग. ढोलावर काठी पडली व ताशांचा आवाज कानांमध्ये घुमू लागला की प्रत्येकाची पावले या पारंपारिक नृत्यावर थिरकत असतात अशा प्रकारची परिस्थिती प्रत्येक गावांमध्ये पहावयास मिळत आहे. झर्मेचा, करंझोळचा चोरोत्सव विशेष ओळख सत्तरीत बनली आहे. मासोर्डेची घोडेमोडणीही प्रसिध्द आहे.