Panaji News :

पणजी, धावे-सोनाळ (सत्तरी) येथील बेकायदा चिरखाणेवर खाण खात्याच्या अधिकाऱ्यांनी पोलिसांच्या मदतीने आज सकाळी सव्वानऊच्या सुमारास छापा टाकला. या कारवाईवेळी सुमारे १० लाखांची मशिनरी जप्त करण्यात आली.

खात्याच्या तक्रारीनंतर वाळपई पोलिसांनी सावर्डे पंचायतीचे माजी सरपंच नीलेश राणे व नगरगावचे उपसरपंच रामा खरवत या दोघांविरुद्ध भादंसंच्या कलम ३७९ व गोवा दमण व दीव खाण व खनिज कन्सेशन नियमाच्या कलम ३ खाली गुन्हा दाखल केला आहे, अशी माहिती खाण संचालक नारायण गाड यांनी दिली.

बेकायदा चिरेखाणी सुरू असल्याची माहिती खाण खात्याला मिळाल्यावर आज सकाळी सव्वानऊच्या सुमारास धावे सोनाळ येथे खात्याचे सहाय्यक भूगर्भ तज्ज्ञ जितेंद्र वेळुस्कर यांनी वाळपई पोलिसांच्या मदतीने छापा टाकला. यावेळी तेथे चार ते पाच कामगार मशिनरीने चिरे काढण्याचे काम करत असताना आढळून आले.

यावेळी घटनास्थळावरून चिरेखाणी काढण्याचे एक मशिन, दोन पावर टिलर, दोन लहान डिझेल जनरेटर, एक मेटल ब्लेड व एक ट्रक एका ठिकाणावरून तर दुसऱ्या ठिकाणावरून एक चिरे दगड कापणारी मशिन, एक पावर टिलर, एक जनरेटर व दोन डिझेल कॅन जप्त करण्यात आले.

ही जमीन संशयित नीलेश राणे यांच्या मालकीची असून संशयित रामा खरवत हा चिरे उत्खनन करत होता. चिऱ्यांचे उत्खनन करण्यासाठी कोणताही परवाना घेतलेला नव्हता. जप्त करण्यात आलेल्या चिऱ्यांचे मूल्यांकन करून त्याची विल्हेवाट लावली जाईल.