वाळपई: दोन दिवसांपासून सत्तरीत पावसाने जोर धरला असून रविवारी सायंकाळी मोठी पडझड झाली. वादळी वाऱ्याचा वीजपुरवठ्यावर परिणाम झाला. रात्री रेडीघाट येथे रस्त्यावर जंगली झाड पडून वाहतूक कोंडी झाली.

तसेच ठाणे सत्तरी येथील मंडळगिरो कोळगिरी मंदिराजवळ असलेले जुने व भले मोठे काजऱ्याचे झाड उन्मळून पडले आणि त्यात वीजवाहिनी जमीनदोस्त झाली. तसेच तीन विजेचे खांब मोडले.

त्यामुळे ठाणे व इतर परिसरातील वीजपुरवठा खंडित होता. यावेळी अग्निशमन दलातर्फे मदतकार्य करत रस्त्यावर व वीजवाहिनीवर असलेला अडथळा दूर केला. या दुर्घटनेत सुमारे ३ लाखांहून अधिक नुकसान झाले.

कोपार्डे-सत्तरीतील प्रतिमा यांच्या घरावर आंब्याचे झाड पडून १० हजारांचे नुकसान झाले. तर २० हजारांची मालमत्ता अग्निशमन दलाच्या जवानांनी वाचविली. सोनाळ -सत्तरी येथील मारुती मंदिराजवळील रस्त्यावर झाड पडले. मलपण येथे सातेरी मंदिराजवळ रस्त्यावर व वीजवाहिनीवर आंब्याचे झाड पडून वीजवाहिनीचे नुकसान झाले. 

दाबोस  पुलाजवळही रस्त्यावर झाडे पडण्याच्या घटना घडल्या. वाळपई कदंब बसस्थानकाजवळ कांता गावकर यांच्या घराच्या शेडवर आंब्याचे झाडून नुकसान झाले.  तसेच अनेक ठिकाणी रस्त्यावर झाडे पडण्याच्या घटना घडल्या. सुदैवाने, कोणतीही जीवीत हानी झालेली नाही.