Goa Water Problem: गोवा मुक्ती होऊन साठ वर्षे उलटली तरीही सत्तरी तालुक्यात पाणी समस्या जैसे थे आहे. आजही टँकरने पाणी पुरवठा केला जातो. सत्तरीतून म्हादई नदी वाहते, शिवाय पायाभूत सुविधांची विकासगंगाही वाहते.

पण पाण्याचे योग्य नियोजन गेल्या साठ वर्षात न झाल्याने समस्या जटील झाली आहे. ही समस्या तातडीने सोडवावी, अशा मागणीचे सत्तरी जलसंपदा लोकाधिकार मंचने निवेदन आज दुपारी वाळपई मामलेदार व उपजिल्हाधिकारी यांना सादर केले.

जलसंवर्धनासाठी सत्तरी जलसंपदा लोकाधिकार मंच, अशी नवी स्थापना करण्यात आलेली असून मंचच्या सदस्यांनी निवेदन दिले आहे.

मंचचे रामनाथ वरक म्हणाले, हा नवा मंच गावोगावी जलसंवर्धनासाठी जनजागृती करणार आहे. त्यासाठी सर्व पंचायतींना निवेदने सादर करणार आहे. सत्तरीतील जलस्त्रोतांचे योग्य व्यवस्थापन व्हायला हवे.

"आजही १८ एमएलडी म्हणजेच दररोज १.८ कोटी लिटर पाण्याची कमतरता भासते. गेल्या पन्नास वर्षात लोकप्रतिनिधींनी तोडगा काढला नाही. शेळप गावात टँकरनेच पाणी पुरविले जाते. बहुतांश गावात पाणी टंचाई आहे. सत्तरीत म्हादई वाहत असूनही समस्या का ?"

-भैरू वरक, जलसंपदा मंच