गत पंचायत मंडळाच्या कार्यकाळात सत्तासंघर्षात आघाडीवर राहिलेल्या मये-वायंगिणी पंचायतीला आता सरपंच बदलाचे वेध लागले आहेत. सत्ताधारी गटात झालेल्या अंतर्गत करारानुसार विद्यमान सरपंच दिलीप शेट यांची सहा महिन्यांची मुदत संपुष्टात आल्याने त्यांनी आता सरपंचपदाचा राजीनामा देण्याची तयारी दर्शविली आहे.

पुढील दोन ते तीन दिवसांत म्हणजेच चालू महिन्याच्या अखेरपर्यंत शेट सरपंचपदाचा राजीनामा देणार असल्याची माहिती मिळाली आहे.

खुद्द सरपंचांकडूनही या माहितीस दुजोरा मिळाला आहे. गेल्या ऑगस्ट महिन्यात झालेल्या पंचायत निवडणुकीत अकरा प्रभागांची असलेल्या मये पंचायतीवर भाजप समर्थक गटाने निर्विवाद वर्चस्व प्रस्थापित केले आहे.

मात्र, सुरवातीपासूनच किमान पाच पंचसदस्य सरपंचपदासाठी इच्छुक होते. मात्र, पंचायत भाजपच्या ताब्यात ठेवण्यासाठी आमदार प्रेमेंद्र शेट यांनी पुढाकार घेताना भाजप समर्थक गटाच्या पंचसदस्यांबरोबर बैठका घेऊन सत्ता स्थापन करण्यासाठी अंतर्गत कराराचा तोडगा काढला. या करारानुसार इच्छुकांना सरपंचपद विभागून देण्याचे ठरविण्यात आले.

पद सोडण्यास तयार

सुरवातीच्या सहा महिन्यांसाठी दिलीप शेट यांना सरपंचपद देण्याचे निश्चित करण्यात आले. त्यानुसार दिलीप शेट यांची सरपंचपदी बिनविरोध निवड झाली. अंतर्गत करारानुसार दिलीप शेट यांचा सरपंचपदाचा कार्यकाळ गेल्याच मंगळवारी (ता.२१) संपुष्टात आला आहे. त्यामुळे करारानुसार दिलीप शेट सरपंचपदावरून उतरण्यास तयार झाले आहेत.