Santa Cruz Waste Collection Contract

पणजी: सांताक्रुझ पंचायत क्षेत्रातील दारोदार कचरा संकलन करण्याचे कंत्राट ६४ लाख रुपयांत मिळविणारा कंत्राटदार पाच महिन्यांपूर्वी ५१ लाखांत काम करण्यास तयार होता. कचरा संकलनाची फाईल पाच महिने सचिवांनी स्वतःकडे ठेवल्यामुळे पंचायतीचे सुमारे १३ लाखांचे नुकसान झाले, असा आरोप माजी उपसरपंच तथा पंच इनासियो डॉम्निक परेरा यांनी केला.

इनासियो म्हणाले, माजी सरपंच एडविन यांनी कचरा उचलण्यासाठी डायस ई-टेंडरिंग प्रक्रिया केली. तीच प्रक्रिया आम्हीही सुरू ठेवली. परंतु आपण एक वर्षांच्या उपसरपंचपदावरून हटताच ई-टेंडरिंग प्रक्रियेचा कालावधी संपला. त्यानंतर सरपंचांनी कचरा उचलणारा कंत्राटदार चांगले काम करतो म्हणून त्याच्याशी करार केला.

या कराराबद्दल आम्हाला दुमत नाही. पण त्याचवेळी सांताक्रुझ पंचायतीने दारोदार कचरा संकलनासाठी निविदा काढली. ती फाईल आपण तीन महिन्यांपासून शोधत आहे. त्यासाठी आरटीआयही घातला. नुकतीच १० डिसेंबर रोजी ती फाईल आपणास मिळाली. ती फेब्रुवारी २०२४ मध्ये सचिवांनी गटविकास अधिकाऱ्यांकडे पाठवायला हवी होती, पण त्‍यांनी ती फाईल पाच महिने स्वतःकडेच ठेवली, असे परेरा यांनी सांगितले.

मी एकमेव विरोधक; तरीही लढत राहीन

सांताक्रुझ पंचायत क्षेत्रातील लोक ९०० रुपये कचरा कर भरत आहेत. पंचायत मंडळात मी एकमेव विरोधक आहोत. तरीही आपण अशा बेकायदेशीर कामांना कधीच पाठीशी घालणार नाही. भ्रष्‍टाचाराविरोधात, अन्‍यायाविरोधात आवाज उठवत राहणार असल्याचे इनासियो डॉम्निक परेरा यांनी सांगितले. सरकारने कचरा संकलनासाठी पंचायतीला एक ट्रक दिला आहे. तो विनावापर पडून आहे. गटविकास अधिकाऱ्यांना त्याबाबत लिहूनही दखल घेतली जात नाही, असा आरोप त्यांनी केला.