साखळी: येथील श्री दत्त मंदिरात गाजलेले मूर्ती चोरी प्रकरण हे याच देवस्थानातील काही महाजनांनी रचलेले षडयंत्र असून मागील समितीने या मूर्ती विसर्जित करण्याचा घेतलेला निर्णय प्रलंबित राहिल्याने ते कार्य आम्ही पूर्ण केले.

या मूर्तींचे विसर्जन हे देवाला प्रसाद लावून तसेच शास्त्रानुसार करण्यात आले आहे. त्यात कोणताही चोरीचा प्रकार नाही. याप्रकरणी डिचोलीच्या मामलेदारांनी अधिकारांचा पूर्णत: गैरवापर केला असून त्यांच्याविरोधात मुख्य सचिव, उत्तर गोवा जिल्हाधिकारी तसेच इतर यंत्रणांकडे खटला गुदरण्यात येणार आहे, असे देवस्थान समितीच्या पदाधिकाऱ्यांनी पत्रकार परिषदेत सांगितले.

या पत्रकार परिषदेस सचिव गजानन भट गावकर, मुखत्यार श्याम बोडके, खजिनदार विठ्ठल सामंत, सल्लागार सदस्य दीपेश कामत, ॲड. निहाल कामत, ॲड. शर्मद बोडके, सल्लागार समिती सदस्य नरसिंह भटगावकर, नागेश दाबोलकर, संजय बोडके आदी उपस्थित होते. साखळीतील श्री दत्तात्रय मंदिरात कोणत्याही मूर्तींची चोरी झालेली नाही.

तीन मूर्ती नार्वे तीर्थावर विसर्जित केल्या आहेत. प्रसाद पाकळीत काही देवस्थानांत काही दोष असल्याचे सांगण्यात आले होते. त्यानुसार समितीच्या निवडणुकीनंतर आम्ही कामाक्षी देवीकडे प्रसाद घेतला असता देवस्थानात असलेल्या काही मूर्तींमध्ये दोष असल्याचे दाखवून देण्यात आले होते. त्या मूर्ती त्वरित विसर्जित करण्याची सूचना देण्यात आली होती. त्यानुसार आम्ही दत्त मंदिरात येऊन दत्त महाराजांना सांगणे केले आणि त्या मूर्ती नार्वे तीर्थावर विसर्जित केल्या.

शास्त्रानुसार मूर्तींचे विसर्जन : राजेश धेंपे

या प्रकरणात देवस्थान समितीच्या कोणत्याही पदाधिकाऱ्यांचा हात नसून हे संपूर्ण प्रकरण खोटे आहे. देवतांचा प्रसाद आणि शास्त्रानुसार या मूर्तींचे विसर्जन करण्यात आले आहे. सध्या हे प्रकरण देवस्थान प्रशासकांकडे न्यायप्रविष्ट असल्याने देवस्थान समितीचे अध्यक्ष या नात्याने प्रत्यक्ष पत्रकार परिषदेत बोलू शकत नाही. त्यामुळे फोनवरच प्रतिक्रिया देत असल्याचे देवस्थान समितीचे अध्यक्ष राजेश धेंपे यांनी सांगितले.