पणजी: संपूर्ण गोव्यात पावसाने थैमान घातले असून जनता हवालदिल झाले आहेत. परंतु मुख्यमंत्री डॉ. प्रमोद सावंत यांनी बुधवार दि. 6 जुलै रोजी एका स्नेहमेळाव्याचे आयोजन केले आहे. राज्यात भाजपचे सरकार स्थापन होऊन शतकपूर्ती झाली आहे. सरकारची शतकपूर्ती करण्यसाठी मुख्यमंत्र्यांनी या स्नेहमेळाव्याचे आयोजन केले आहे. दुसरीकडे मात्र, राज्यातील कॉंग्रेस नेत्यांनी या स्नेहमेळाव्यावरुन भाजप सरकारवर हल्लाबोल केला आहे. कॉंग्रेसचे विधीमंडळ गट नेते आणि मुरगावचे आमदार संकल्प आमोणकर यांनी सावंत सरकारचा चांगलाच समाचार घेतला.

दरम्यान, भाजप (BJP) सरकारची शतकपूर्ती निमीत्त मुख्यमंत्र्यांच्या कार्यालयातून मला सदर स्नेहमेळाव्यास उपस्थित राहण्याचे निमंत्रण मिळाले आहे. यामधून भाजप सरकार किती असंवेदनशीलपणाने वागत आहे हे दिसून येते, असे आमदार अमोणकर यांनी म्हटले आहे.

दुसरीकडे, संपूर्ण गोवा आज या अस्मानी संकटाचा सामना करत आहे. लोक बेघर झाले आहेत. मुख्यमंत्री आणि इतर मंत्र्यांनी खरंतर लोकांना मदत करण्यासाठी पुढे येणे गरजेचे होते. दुर्देवाने मुख्यमंत्री स्नेहमेळाव्याचे आयोजन करुन उत्सव साजरे करण्यात धन्यता मानत आहेत, अशी बोचरी टिका संकल्प आमोणकर यांनी केली.

शिवाय, मुख्यमंत्री डॉ. प्रमोद सावंत (Chief Minister Dr. Pramod Sawant) यांनी सदर स्नेहमेळाव्याचे आयोजन रद्द करावे. सरकारी तिजोरीतून जनतेचा पैसा वायफळ खर्च करण्याचा भाजप सरकारला अधिकार नाही. सरकारने (Government) खर्च कपात करुन जनतेला मदत करणे गरजेचे आहे, असेही संकल्प आमोणकर यांनी म्हटले.