smart city panaji: पणजीत मागील अनेक दिवसांपासून इमेजिन पणजीच्या अंतर्गत स्मार्ट सिटीची कामे सुरू आहेत. विकासकामांसाठी शहरात विविध ठिकाणी खोदकाम करण्यात आले आहे. पावसाळा तोंडावर आला तरी अद्याप कामे पूर्ण न झाल्याने पावसाळ्यात पणजी बुडल्यास जबाबदारी कोणाची असा प्रश्न सध्या उपस्थित केला जात आहे.

दरम्यान, स्मार्ट सिटी कामाचा एक धड भारभर चिंध्या या अवस्थेला सावरण्यासाठी पालिकेचे एकेकाळी आयुक्त राहिलेले संजीत रॉड्रिग्स (Sanjit Rodrigues IAS) यांना पाचारण करण्यात आले आहे.

स्मार्ट सिटीच्या विळख्यातून पणजीला वाचवण्यासाठी संजीत रॉड्रिग्स यांना पाचारण आले असून, कार्मिक खात्याकडून याबाबत आदेश जारी करण्यात आले आहेत. इमेजिन पणजीच्या मुख्य कार्यकारी अधिकारी आणि व्यवस्थापकीय संचालकपदाची जबाबदारी रॉड्रिग्स यांच्याकडे सोपविण्यात आली आहे.

रॉड्रिग्स पणजी महापालिकेचे ते आयुक्त राहिले आहेत. त्यामुळे शहराची त्यांना संपूर्ण माहिती आहे. तात्काळ प्रभावाने त्यांच्याकडे ही सूत्रे सोपविण्यात आली आहेत.

दरम्यान, संजीत रॉड्रिग्स यांनी याबाबत अद्याप कोणतेही वक्तव्य केलेले नाही. रॉड्रिग्स यांच्यावर शहरातील स्मार्ट सिटीच्या कामामुळे निर्माण झालेली परिस्थिती पूर्ववत करण्याचे मोठे आव्हान असणार आहे.

पावसाळ्यापूर्वी शहरात पाणी साचणे, वाहतूक कोंडी अशा अनेक समस्यांवर तोडगा काढावा लागणार आहे. अन्यथा पावसामुळे होणाऱ्या अडचणींचा समाना पणजीकरांना करावा लागणार यात शंका नाही.