Sangem: अनिता फर्नांडिस यांच्या अपघातात झालेल्या मृत्यू प्रकरणाचे पडसाद सांगेत उमटू लागले असून काल घटना घडली त्यावेळी दुःख अनावर होऊन अनेकांनी झाड तोडण्यासाठी हरकत घेणाऱ्या महिलेला जाब विचारला.

त्यावेळी ती महिला तावातावाने जागा आपली, पण झाड पोलिसांचे असे सांगत होती, पण त्याच महिलेने काल निवृत्त शिक्षिका कार्लथ कार्व्हालो यांच्याविरुद्ध सांगे पोलिस स्थानकात तक्रार नोंदविली असल्यामुळे सांगेत तणावपूर्ण वातावरण निर्माण झाले.

सविस्तर घटनेनुसार चालत्या गाडीवर झाड पडून अनिता फर्नांडिस यांचा काल जागीच मृत्यू होण्याची दुर्घटना घडली. त्यावेळी झाड कापण्यास हरकत घेणाऱ्या महिलेला काही संतप्त लोकांनी जाब विचारला,

पण काल त्या महिलेने कार्लथ कार्व्हालो यांच्याविरुद्ध सांगे पोलिस स्थानकात तक्रार नोंदविताना यापुढे काही घडल्यास कार्लथ कार्व्हालो ही जबाबदार राहणार असून तिनेच लोकांना भडकावले असल्याची तक्रार नोंदविली आहे.

या तक्रारीची नोंद घेऊन सांगे पोलिसांनी कार्लथ कार्व्हालो यांना चौकशीसाठी बोलावून घेण्यात आले असता संतापलेल्या सांगेतील ग्रामस्थांनी सांगे पोलिस स्थानकाबाहेर गर्दी केली.

पोलिस स्थानकात कार्लथ कार्व्हालो यांनी आपली बाजू मांडताना आपण कोणालाही भडकावले नसल्याचे स्पष्ट केले.

वन खात्याकडून मिळालेल्या माहितीनुसार, झाड कापण्यासाठी यापूर्वीच ना हरकत दिलेली होती. असे असताना स्थानिक प्रशासनाने झाड न कापल्यामुळेच अनिता फर्नांडिस या महिलेचा निष्पाप बळी गेल्याचा संताप पोलिस स्थानकाबाहेर जमलेल्या लोकांनी व्यक्त केला.