सासष्टी: मडगावच्या पॉप्युलर हायस्कूलमध्ये विद्यार्थ्यांतर्फे ‘चतुर्थीचा बाजार’ उपक्रम शनिवार,२३ रोजी सकाळी ९.३० वाजल्यापासून राबविण्यात आला. या बाजारात विद्यार्थ्यांनी माटोळीचे सामान, खाद्य पदार्थ व सजावटीच्या वस्तू विक्रीस उपलब्ध केल्या. यावेळी विद्यार्थ्यांमध्ये उत्साह संचारलेला दिसला. पालकांनी व शिक्षकांनी त्यांना हा बाजार भरविण्यास प्रोत्साहित केले.

बाजाराचे उद्‍घाटन शिक्षण खात्याचे अधिकारी सुदन नाईक गावकर, दवर्लीचे सरपंच श्याम एम राजाध्यक्ष, हायस्कुलच्या व्यवस्थापन समितीचे अध्यक्ष अवधुत प्रभू पर्रीकर, नवीन रायकर, वल्लभ रायकर, मुख्याध्यापिका सुचित्रा देसाई व इतर शिक्षक व पालक उपस्थित होते.

अवधूत पर्रीकर यांनी सांगितले की आताच्या मुलांना व्यवहार, बाजार करणे जमत नाही. त्यांना व्यवसायातील बारकाई समजत नाही. त्यासाठी विद्यार्थ्यांना याची महिती मिळावी व जाणीव व्हावी म्हणून हा उपक्रम आम्ही राबविला. याची दखल इतर शाळांनीही घेणे आवश्यक आहे.

नवीन शैक्षणिक धोरणात कौशल्य प्रशिक्षण व विकासाला महत्व देण्यात आले असून या उपक्रमामुळे विद्यार्थ्यांमध्ये सुद्धा कौशल्या विकासास वाव मिळेल असे मत त्यांनी व्यक्त केले.

सुदन नाईक गावकर म्हणाले की या बाजारामुळे विद्यार्थ्यांना खरेदी व विक्री तसेच व्यवहारातील उलाढाल याचा चांगला अनुभव मिळेल. मुलांना अशा उपक्रमांसाठी प्रोत्साहीत करणे गरजेचे आहे असेही त्यांनी सांगितले.

पालकांनी, शिक्षकांनी व परिसरातील नागरिकांनी बाजाराला भेट देऊन विद्यार्थ्यां कडील वस्तू विकत घेऊन त्यांना प्रोत्साहित केले.