सासष्टी: साळ नदी ही सासष्टीतील जीवनदायिनी मानली जाते; पण आता या नदीची परिस्थिती फार खालावलेली आहे. स्वच्छता नाही, पाणी व परिसर प्रदूषित आहे व सर्वात महत्त्वाचे म्हणजे सरकारचे व लोकप्रतिनिधींचे त्याकडे दुर्लक्ष झाले आहे.

गेल्या कित्येक वर्षांपासून साळ नदीच्या स्वच्छता मोहिमेसाठी सरकारतर्फे करोडो रुपये खर्च केले जातात. मात्र, नदीतील स्वच्छता केली जात नाही. त्यामुळे हा अवाढव्य खर्च नेमका कुठे केला जातो, हा प्रश्न लोकांना पडलेला आहे.

साळ परिसरातील एक व्यापारी व समाजकार्यकर्ते सुदेश मळकर्णेकर यांच्या म्हणण्यानुसार, पोर्तुगीज काळात या नदीतून लोक व्यापार करीत होते.

खारेबांध येथे व्यापाराची उतरण केली जात असे. शिवाय या नदीत वेगवेळ्या प्रकारचे मासे मिळत; पण आता या नदीचे वैभव कुठेतरी हरवल्यासारखे वाटते. या नदीचा अजूनही अनेक कामांसाठी उपयोग होऊ शकतो.