Sadye Panchayat Gramsabha

शिवोली: सडये- पंचायतीच्या ग्रामसभेत होऊ घातलेल्या बहुमजली प्रकल्प तसेच जलतरण प्रकल्पांना होणारा पाणी पुरवठा तत्काळ बंद करावा,अशी मागणी ग्रामस्थांनी रविवारी केली. ही ग्रामसभा गावच्या विकासकामांवरून गाजली.

यावेळी, सीएसआर निधीचा उपयोग गावच्या विकासकामांसाठी तसेच स्थानिक विद्यार्थ्यांच्या प्रगतीसाठी उपयोगात आणण्याचे पंचायत मंडळाकडून निश्चित करण्यात आले. दरम्यान, रविवारी सकाळी १०.३० वा. सुरू झालेली ही ग्रामसभा दुपारी एक पर्यत चालली होती. यावेळी, ग्रामस्थांनी पंचक्रोशीतील विविध विकासकामांवरून चाललेल्या चर्चेत सहभाग घेतला.

दरम्यान , सडये पंचायतीच्या कक्षेत होऊ घातलेल्या बहुमजली रहिवासी प्रकल्पांना तसेच तेथील जलतरण प्रकल्पांना सार्वजनिक बांधकाम खात्याकडून होत असलेला पाणी पुरवठा तात्काळ बंद करण्यात यावा, असे स्थानिक ग्रामस्थ पीटर फर्नांडिस यांनी ग्रामसभेत सांगितले. तिळारीतून येणारे पाणी थेट या प्रकल्पांना देऊ कामा नये, अन्यथा रस्त्यावर उतरावे लागेल,असा इशाराही फर्नांडिस यांनी दिला.

सामूहिक शेतीला प्राधान्य देणार!

सडये पंचक्रोशीतील पडीक शेतजमिनीत सामूहिक शेती लागवड करण्यासाठी स्थानिक तरुण-तरुणींना प्रोत्साहित करण्यात येणार असून येत्या हंगामापासून हा प्रयोग यशस्वी करण्यासाठी पंचायत मंडळ प्रयत्नशील असल्याचे सरपंच दीपा पेडणेकर तसेच उपसरपंच नीलेश वायंगणकर यांनी ग्रामस्थांनी विचारलेल्या एका प्रश्नाला उत्तर देतांना सांगितले. शिवाय अंतर्गत रस्त्यांच्या डांबरीकरणाला लवकरच गती देण्याचे आश्वासन पंचायत मंडळाकडून सभेला देण्यात आले.