गंगाराम आवणे

Goa Police: गोवा अभियांत्रिकी महाविद्यालयाच्या आयटी शाखेच्या विद्यार्थ्यांनी विकसित केलेल्या ई-बीट बुक ॲपमुळे राज्यातील पोलिस यंत्रणा बळकट होणार असून सुरक्षेच्या अनुषंगाने अधिक सक्षमता येणार असल्याने हा ॲप राज्यासाठी सुरक्षा कवचाचे कार्य करणार आहे.

या ॲपमुळे पोलिस अधिकाऱ्यांना एका क्लिकवर प्रत्येक पोलिस बीटवरील सर्व आवश्यक माहिती मिळविण्यात मदत होणार आहे. हे ॲप अथर्व पारखे, ग्रीष्मा मदाम, आर्यन घोरपडे, अभिनव खुरुप, नॅथन हेन्रिक्स, रघुरन शेट्टी, रिधिकेश वेर्णेकर या विद्यार्थ्यांनी तयार केले आहे.

प्रत्येक पोलिस स्थानकांच्या अखत्यारीत अनेक विभाग (बीट्स) असतात. तेथील सर्व नोंदींसाठी एक बीट बुक असते. प्रत्येक पोलिस स्थानकातील मंदिरे, चर्च, बॅंक, पोस्ट ऑफीस, सार्वजनिक ठिकाणे तसेच महत्‍त्वाच्या ठिकाणांना प्रत्यक्ष भेट देऊन कायदा व सुव्यवस्थेसाठी हाक हवाला घेऊन त्याचे नोंदणी बीट बुकमध्ये करतात.

या ॲपमध्ये माहिती नोंदवून प्रत्यक्षदर्शी पाहणी केल्याचे फोटो यात अपलोड केले जातील. त्यामुळे एकाअर्थी या ॲपमुळे बीट बुक डिजिटल होणार आहे.

गुन्हा घडल्यास पोलीस अधिकारी बीट बुक पाहत असतात जेणेकरून मागील इतिवृत्तात कळू शकेल. पोलीस अधिकाऱ्यांनी बीट बुक मागवून त्यावर अभ्यास करणे ही मोठी प्रक्रिया होते. ही माहिती पोलीस अधिकाऱ्यांना डॅशबोर्डद्वारे एका क्लिकवर मिळणार आहे. या ॲपसाठी महाविद्यालयाचे प्राचार्य डॉ. एम.एस.कृपाशंकर, पोलीस अधीक्षक निधीन वाल्सन, आयटी विभागाचे प्रमुख डॉ. नीलेश फळदेसाई यांचे महत्त्वपूर्ण सहकार्य लाभले.