Russian Women Molested In Goa: दिल्लीतील बिझनेस पार्टनरने गोव्यात रशियन महिलेचा विनयभंग केल्याची घटना समोर आली आहे. गेल्या आठवड्यात उत्तर गोव्यातील एका रिसॉर्टमध्ये ही घटना घडली.

पोलिसांनी दिलेल्या महितीनुसार, महिला आणि संशयित आरोपी एका व्यावसायिक बैठकीसाठी गोव्यात आले होते. रशियन महिला मुंबईहून आली होती, तर संशयित दिल्लीतून गोव्यात आला होता. रिसॉर्टमध्ये त्याने दोन खोल्या बुक केल्या होत्या.

याप्रकरणी 44 वर्षीय रशियन महिलेने पोलिसांत तक्रार दिली आहे. संशयिताने महिलेला बेडवर ढकलून तिचे चुंबन घेतले. तसेच, महिलेवर जबरदस्ती करण्याचा प्रयत्न करत असताना तिने पळ काढला आणि मदतीसाठी आरडाओरडा केला. 12 ऑक्टोबर रोजी उत्तर गोव्यातील एका रिसॉर्टच्या खोलीत ही घटना घडली.

उत्तर गोव्याचे पोलीस अधीक्षक निधिन वाल्सन यांनी दिलेल्या माहितीनुसार, संशयिताविरोधात भारतीय दंड संहितेच्या कलम 354 (महिलेवर हल्ला किंवा गुन्हेगारी बळजबरी करणे) अंतर्गत गुन्हा दाखल करण्यात आला आहे.

'महिलेची जबानी अद्याप दंडाधिकाऱ्यांसमोर नोंदवायची असून, संशयित आरोपीला CrPC च्या कलम 41A अंतर्गत नोटीस बजावण्यात आली आहे,' असे वाल्सन म्हणाले.