मोरजी: मोरजी व हरमल या दोन ठिकाणी झालेल्या दोन रशियन महिलांचा खून हा केवळ पैशांच्या आशेपोटी आणि प्रेम संबंधामुळेच केल्याचे उघड झाले आहे. हरमल बामन भाटी या एका भाड्याच्या खोलीत राहणाऱ्या रशियन आलेक्सेई लिनोवा या पर्यटकाने एलिना नामक दोन रशियन महिलांचा गळा चिरून खून केला होता.

त्यानंतर त्याने तिसन्याही खुनाची कबुली दिली. या घटनेमुळे संपूर्ण राज्य हादरले आहे. संशयित आलेक्सेई लिओनोव याने मांद्रे पोलिसांना आज जबानी दिली.

यासंदर्भात, पोलिस निरीक्षक गिरेंद्र नाईक यांच्याकडे संपर्क साधला असता, ते म्हणाले संशयिताने रशियन महिलांचा खून केल्याचे कबुली दिली आहे. पोलिस यासंदर्भात अधिक पुरावे गोळा करीत आहेत. त्याने केलेले हे खून हा पैशासाठी आणि प्रेम संबंधातून केलेले असल्याचे सध्यातरी दिसून येत आहे.

दरम्यान, संशयित हा रशियन महिलांसोबत संबंध जुळवत होता. त्यांना आपल्या प्रेमात पाडून विश्वास संपादन करीत होता. या महिलेने इतर दुसऱ्यासोबत संबंध ठेवल्याचे त्याला कळले की, तो प्रचंड तणावाखाली यायचा. या रागातून तो महिलांना टार्गेट करीत होता.

त्यापूर्वी तो महिलांकडून मोठ्या प्रमाणात पैसही उकळत होता. जर पैसे देत नसेल तर महिलांचा मानसिक छळ देखील करायचा, अशी माहिती उपलब्ध झाली आहे.

गृह खात्याच्या अधिकाऱ्यांनी पोलिस निरीक्षक, पोलिस उपअधीक्षकांना वेगवेगळ्या सूचना करून संशयिताने आणखी खून केलेत का तसेच तो जबान्या बदलून पोलिसांची दिशाभूल करीत आहे का, याचा तपास घेण्यात येत आहे.