Ponda : राज्यातील पर्यटन क्षेत्राला चालना देताना गोमंतकीय युवकांना या क्षेत्रात रोजगार प्राप्त व्हावा, यासाठी हॉटेल व्यवस्थापनातून रोजगार संधी निर्माण करण्यात येतील, अशी ग्वाही देताना फोंडा तालुका पर्यटन हब करण्याचा सरकारचा विचार असल्याचे पर्यटनमंत्री रोहन खंवटे यांनी सांगितले.

फर्मागुढी - फोंड्यातील हॉटेल मॅनेजमेंट इन्स्टिट्यूट प्रकल्पाच्या कामाची पाहणी करण्यासाठी मंत्री खंवटे, गोवा पर्यटन विकास महामंडळाचे अध्यक्ष तथा आमदार डॉ. गणेश गावकर यांनी केली. या पाहणीवेळी मुख्य अभियंता प्रमोद बदामी व कन्सल्टंट रवीशंकर यांच्यासह इतर अधिकारी उपस्थित होते.

चार महिन्यांत हा प्रकल्प पूर्ण केला जाईल, असे खंवटे यांनी सांगितले. ‘पर्यटन खाते व पर्यटन विकास महामंडळाच्या माध्यमातून राज्यातील पर्यटनाला चालना देतानाच गोमंतकीय युवकांना रोजगाराच्या संधी उपलब्ध करण्याची आवश्‍यकता आहे.

त्यासाठी गावकर यांच्याशी चर्चा झाली असून हॉटेल व्यवस्थापनातून पर्यटनात जास्त रोजगार संधी आहेत, त्याचा लाभ या प्रकल्पात शिकून आणि प्रशिक्षणाद्वारे घ्यावा, असे खंवटे म्हणाले.

दरवर्षी 320 विद्यार्थी प्रशिक्षित

फर्मागुढीतील या हॉटेल व्यवस्थापन इन्स्टिट्यूटद्वारे दरवर्षी किमान 320 विद्यार्थी प्रशिक्षित केले जाणार आहेत. या प्रशिक्षणात पूर्णपणे गोमंतकीय विद्यार्थ्यांना संधी देण्यात येईल. प्रथम प्राधान्य गोमंतकीय विद्यार्थी असेल असे सांगताना गोमंतकीय युवकांना रोजगाराच्या संधीसाठी हॉटेल मॅनेजमेंटद्वारे विविध क्षेत्रात रोजगारासाठी प्रशिक्षित केले जाईल, असे पर्यटनमंत्री रोहन खंवटे यांनी सांगितले.

फर्मागुढी किल्ल्याला देणार प्राधान्य

फर्मागुढीतील गोपाळ गणपती देवस्थानासमोरील शिवाजी महाराजांच्या किल्ल्याच्या पूनर्बांधणीसह पर्यटनाला आवश्‍यक सुविधा उपलब्ध करून देण्यासाठी सरकार बांधील आहे. गोवा साधनसुविधा विकास महामंडळातर्फे या किल्ल्याचे काम सुरू केले जाणार आहे. पर्यटनासाठी आवश्‍यक सुविधा पर्यटकांना या ठिकाणी उपलब्ध केल्या जातील आणि त्यातूनच पर्यटनाला चालना देण्यात येईल, असेही रोहन खंवटे यांनी सांगितले.