Revolutionary Goans : देशभरातील विविध प्रादेशिक पक्षांच्या नेत्यांना भेटून त्यांचे धोरण समजून घेणार आहे. या उद्देशाने मनसेचे अध्यक्ष राज ठाकरे आणि महाराष्ट्राचे मुख्यमंत्री एकनाथ शिंदे यांना भेटून त्यांनी जनतेसाठी राबविलेली विविध धोरणे समजून घेतली आहेत. परंतु आमच्या धोरणांशी आणि पोगो विधेयकाशी तडजोड करणार नाही, अशी माहिती रिव्होल्‍युशनरी गोवन्सचे सर्वेसर्वा मनोज परब यांनी दिली. पणजी येथे घेतलेल्या पत्रकार परिषदेत ते बोलत होते.

राज ठाकरे यांच्यासोबत गोमंतकीयांच्या हक्कांसाठी सुरू असलेली लढाई आणि ‘आरजी’ पक्षाचे काम या दोन विषयांवर आपण चर्चा केली. गोमंतकीय जनतेच्या हक्कांसाठी आरजी सदैव काम करणार आहे. प्रादेशिक पक्षांच्या कार्यशैलीबद्दल, नागरिकांसाठी करत असलेल्या चांगल्या कामाबद्दल आम्हाला खूप माहिती मिळाली, असे परब म्हणाले.

15 वर्षांच्या रहिवासी प्रमाणपत्राच्या आधारे राज्यात येऊन स्थायिक झालेल्यांना नोकऱ्या द्यायच्‍या असल्याने सरकारला पोगो विधेयक मंजूर करायचे नाही. भाजप सरकारला केवळ बिगर गोमंतकीयांना नोकऱ्या देऊन मतांचे राजकारण करण्यात रस आहे, असा आरोप ‘आरजी’चे सर्वेसर्वा मनोज परब यांनी केला आहे.