मडगाव: बंगले विक्री करण्याचे आमिष दाखवून एका निवृत्त सरकारी कर्मचाऱ्याची ९९ लाख ५० हजार रुपयांची फसवणूक केल्याचा प्रकार बाळ्ळी येथे उघडकीस आला आहे.

या प्रकरणी कुंकळ्ळी पोलिसांनी लीना मेंडिस या संशयित महिलेविरुद्ध भारतीय दंड संहितेच्या कलम ४२० अंतर्गत फसवणुकीचा गुन्हा दाखल केला आहे.बाबू कोळेकर (६२) यांनी याप्रकरणी पोलिसांत तक्रार दाखल केली आहे. पोलिसांनी दिलेल्या माहितीनुसार, जून २०२३ पासून आजपर्यंतच्या कालावधीत हा प्रकार घडला.

संशयित लीना मेंडिस ही नेरुल येथील रहिवासी असून, तिने कोळेकर यांना सुरुवातीला कोलोटा येथील एक बंगला स्वतःच्या मालकीचा असल्याचे सांगितले. हा बंगला विक्रीसाठी उपलब्ध असल्याचे भासवून तिने त्यांच्याकडून ७५ लाख रुपये घेतल्याचा आरोप आहे.