पणजी: सुकून हॉस्पिटॅलिटी या नामांकित संस्थेची तब्बल 4.37 कोटी रुपयांची फसवणूक केल्याच्या आरोपाखाली असागाव येथील एका प्रसिद्ध रेस्टॉरंटच्या जनरल मॅनेजरला अटक करण्यात आली आहे. गुलशन कुमार सिंग (वय 32) असे अटक केलेल्या आरोपीचे नाव असून, त्याला शुक्रवारी (9 मे) हणजूण पोलिसांनी दिल्ली येथून अटक केली.

पोलिसांनी दिलेल्या माहितीनुसार, ऑगस्ट 2021 ते फेब्रुवारी 2025 या कालावधीत आरोपीने (Accused) संस्थेच्या बिलांमध्ये फेरफार, तसेच विक्रेत्यांच्या पेमेंटसाठी असलेल्या निधीचा हिशेब न देण्याचा आरोपही त्याच्यावर आहे. त्यामुळे संस्थेला कोट्यवधींचे नुकसान सहन करावे लागले. या आर्थिक गैरव्यवहाराची माहिती मिळताच सुकून हॉस्पिटॅलिटीने पोलिसांकडे तक्रार दाखल केली होती.

दरम्यान, या गुन्ह्याच्या तपासासाठी हणजूण पोलिस ठाण्याचे पीएसआय स्वप्नील नाईक आणि त्यांच्या विशेष पथकाने दिल्लीमध्ये शोधमोहीम राबवून आरोपीला ताब्यात घेतले. अटक केल्यानंतर आरोपीला सात दिवसांची पोलिस कोठडी सुनावण्यात आली असून, पोलिस त्याच्याकडून फसवणुकीतील निधीचा तपशील उघडकीस आणण्याचा प्रयत्न करत आहेत.

पोलिस सूत्रांनी दिलेल्या माहितीनुसार, हा आर्थिक गैरव्यवहार अत्यंत नियोजनबद्ध पद्धतीने करण्यात आला असून, यामध्ये इतर कर्मचार्‍यांचा सहभाग होता का याचीही चौकशी सुरु आहे. पोलिसांकडून कसून तपासणी केली जात असून, पुढील काही दिवसांत या प्रकरणात आणखी खुलासे होण्याची शक्यता आहे.