मडगाव : वार्का येथील एका रेस्टॉरंटचा भाग पाडण्याच्या आदेशाला एनजीटीच्या नवी दिल्लीतील प्रधान खंडपीठाने सशर्त स्थगिती दिली आहे. या प्रकरणी सदर रेस्टॉरंटच्या (restaurant) व्यवस्थापनाने दाखल केलेल्या याचिकेवर हा निवाडा देताना बांधकामाचा वादग्रस्त भाग खातरजमा केल्याशिवाय पाडला जाऊ नये असे स्पष्ट केले आहे.

अर्जदाराने जरी सदर बांधकाम हे विकासवर्ज्य विभागापासून दूर आहे हे दाखवून देणारे कोणतेच पुरावे सादर केलेले नसले तरी खबरदारी म्हणून त्याला सुस्पष्ट निवेदन सादर करण्याची संधी दिली जात असल्याचे आदेशात म्हटले आहे.

संबंधिताला हे सारे पंधरा दिवसांच्या मुदतीत गोवा (goa) किनारी विभाग व्यवस्थापन प्राधिकरणाकडे सादर करावे लागेल. खंडपीठाने गोवा प्राधिकरणास चेन्नईतील एनसीएससीएमच्या सहकार्याने त्याची खातरजमा करण्यास सांगितले आहे. त्या अहवालाचा अभ्यास करून या प्रकरणी नवा आदेश जारी केला जाईल. नव्या आदेशासंदर्भात दाद मागण्याची मुभाही अर्जदारास राहणार आहे.

दरम्यान, काणकोण (Canacona) येथील एका रिसॉर्ट प्रकरणात इनासियो डॉम्‍निक परेरा यांनी दाखल केलेल्या एका याचिकेसंदर्भात प्रधान खंडपीठाने अर्जदारास त्याच्या दाव्याबाबत अधिक तपशील प्राधिकरणासमोर सादर करण्याची सूचना केली आहे. एका संयुक्त समितीने केलेल्या तपासणी अहवालाकडे तसेच प्रकल्पाच्या पुरस्कर्त्याने सादर केलेल्या अहवालाकडेही लक्ष वेधले आहे.