गेल्या काही दिवसांपासून कोलकाता येथील महिला डॉक्टरील लैंगिक अत्याचार आणि हत्या प्रकरण चांगलंच गाजत आहे. या प्रकरणाच्या निषेधार्थ गोवा मेडिकल कॉलेजमधील निवासी डॉक्टर आजही (सोमवार, 19 ऑगस्ट) संपावर आहेत. गोवा मेडिकल कॉलेजच्या डीनला त्यांनी पत्राद्वारे माहिती दिली आहे.

दरम्यान, गोवा मेडिकल कॉलेजमधील (Goa Medical College) ओपीडी संपानंतरही सुरु राहणार आहेत. याशिवाय, आपत्कालीन सेवा देखील सुरु राहणार आहेत. गोमेकॉचे डीन शिवानंद बांदेकर यांनी सांगितले की, विभागप्रमुख आणि सल्लागारांच्या सेवेसह ओपीडी आणि आपत्कालीन सेवा सुरु राहतील.

कोलकाता येथील घटनेच्या निषेधार्थ गोमेकॉतील निवासी डॉक्टरांनी शुक्रवारपासून संपाला सुरुवात केली होती. त्यांनी यावेळी सोमवारपर्यंत आपण संपावर असणार आहोत, असे पत्र निवासी डॉक्टरांच्या संघटनेने आम्हाला दिले आहे. गार्ड सोमवारी संध्याकाळापर्यंत संपाबाबत भूमिका स्पष्ट करतील असेही डीन डॉ. शिवानंद बांदेकर यांनी सांगितले.

बांदेकर यांनी पुढे सांगितले की, निवासी डॉक्टरांच्या संपादरम्यान रुग्णांची (Patient) गैरसोय होणार नाही याची आम्ही काळजी घेत आहोत. ओपीडीमध्ये पुरेशी व्यवस्था करण्यात आली आहे. निवासी डॉक्टर देखील आपत्कालीन सेवा आणि शस्त्रक्रियेसाठी तयार आहेत, असेही बांदेकर यांनी सांगितले.