Kolkata Doctor Case: कोलकाता लैंगिक अत्याचार प्रकरणात ममता बॅनर्जींनी हालगर्जीपणा दाखवला; CM सावंत

कोलकाता येथील आरजी कर महाविद्यालयातील महिला डॉक्टरवर लैंगिक अत्याचार आणि हत्या प्रकरणाने अवघा देश हादरला. गोव्यातही या घटनेचे पडसाद उमटले आहेत. काल (16 ऑगस्ट) बांबोळी येथील गोवा वैद्यकीय महाविद्यालयाच्या विद्यार्थी आणि डॉक्टरांकडून या घटनेच्या निषेधार्थ आंदोलनाची हाक देण्यात आली होती. यातच आज (17 ऑगस्ट) विद्यार्थी आणि डॉक्टरांकडून मूक मोर्चा काढण्यात आला. याच पार्श्वभूमी आता गोव्याचे मुख्यमंत्री डॉ. प्रमोद सावंत यांनीही आपली प्रतिक्रिया दिली आहे. पश्चिम बंगालच्या मुख्यमंत्री ममता बॅनर्जी यांनी अशा संवेदनशील प्रकरणात हालगर्जीपणा दाखवल्याबद्दल मुख्यमंत्री सावंत यांनी चांगलाच समाचार घेतला. मुख्यमंत्री सावंत म्हणाले की, ''कोलकाता येथील महिला डॉक्टरवरील अत्याचारप्रकरणी पश्चिम बंगालच्या मुख्यमंत्री ममता बॅनर्जी यांनी स्वत: एका महिला असून हालगर्जीपणा दाखवल्याबद्दल मी निषेध व्यक्त करतो.''