Electricity Poles: चोडण बेटावरील पोंबुर्फा फेरीबोटीकडे जाणाऱ्या मुख्य रस्त्याचे रुंदीकरण केल्यामुळे गेल्या चार महिन्यांपासून येथील दोन वीज खांब वाहतुकीस धोकादायक ठरत होते. याची गंभीर दखल घेत चोडण विकास समितीने वीज खात्याकडे पाठपुरावा करून दोन्ही जुने खांबे हटवले.

त्याठिकाणी रस्त्यालगत नवे खांब उभारल्याने वीज खात्याचे साहाय्यक अभियंते कनिष्ठ अभियंते चेतन चोडणकर यांचे ग्रामस्थांनी अभिनंदन केले.

काही महिन्यांपूर्वी केलेल्या रस्ता रुंदीकरणाच्या कामाची चोडण विकास समिती व चोडण पंचायतीतर्फे पाहणी करण्यात आली.

त्यावेळी हे दोन्ही वीज खांब रस्त्याच्या मधोमध असल्याची दृष्टीस पडले. हे खांब रात्रीच्या वेळी वाहनचालकांसाठी मोठी समस्या बनले होते.

भीषण अपघातही या खांबांमुळे होण्याची शक्यता होती. याविषयी दैनिक ‘गोमन्तक’मध्ये वृत्त प्रसिद्ध करण्यात आले होते. अखेर ते दोन्ही खांब हटवल्याने ग्रामस्थांनी समाधान व्यक्त केले.