मडगाव: विवाहाचे वचन देऊन बलात्कार तसेच १८ लाख रुपये व सोन्याचे दागिने घेऊन फसवणूक केल्याच्या प्रकरणातील आरोपातून हनुमंत राठोड याची दक्षिण गोवा जिल्हा प्रधान सत्र न्यायालयाने पुराव्याअभावी निर्दोष सुटका केली. न्यायाधीश शर्मिला पाटील यांच्या न्यायालयात याप्रकरणी सुनावणी झाली.

या प्रकरणात २९ वर्षीय पीडितेने झुआरीनगर, सांकवाळ येथील राठोडविरुद्ध तक्रार दाखल केली होती. तक्रारीनुसार, राठोडने लग्नाचे आमिष दाखवून तिच्या इच्छेविरुद्ध शारीरिक संबंध प्रस्थापित केल्याचा आरोप करण्यात आला होता. तसेच, तिच्याकडील अंदाजे १८ लाख रुपये रोख व सोन्याचे दागिने त्याने उसने घेतले होते. त्यानंतर ही रक्कम व दागिने परत करण्यास तसेच तिच्याशी लग्न करण्यास त्याने नकार दिल्याचा आरोप तक्रारीत करण्यात आला होता.

या तक्रारीच्या आधारे वेर्णा पोलिसांनी संशयित राठोडविरुद्ध बलात्कार, फसवणूक आणि गुन्हेगारी धमकीच्या आरोपांखाली गुन्हा दाखल केला होता. युक्तिवाद आणि उपलब्ध पुरावे तपासल्यानंतर न्यायालयाने संशयिताविरोधात ठोस पुरावे नसल्याने आरोपांतून निर्दोष सुटका केली.