पणजी: सामाजिक कार्यकर्ते रामा काणकोणकर हल्ला प्रकरणी अटकेत असणाऱ्या मुख्य संशयित गुंड जेनिटो कार्दोझला अखेर सशर्त जामीन मंजूर झाला आहे. पाच लाख रुपयांच्या हमीवर मेरशी येथील सत्र न्यायालयाने जेनिटोला जामीन दिला आहे. रामा यांच्यावर सप्टेंबरमध्ये जीवघेणा हल्ला झाल्यानंतर राज्यातील सामाजिक आणि राजकीय वातावरण ढवळून निघाले होते.

सामाजिक कार्यकर्ते रामा काणकोणकर यांच्यावर १८ सप्टेंबर रोजी सात ते आठ जणांच्या टोळक्याने जीवघेणा हल्ला केला होता. याप्रकरणात पोलिसांनी २१ सप्टेंबर रोजी सराईत गुंड जेनिटो कार्दोझ याच्यासह इतर सात जणांना अटक केली होती. जेनिटोसह इतरांची न्यायालयीन कोठडीत रवानगी करण्यात आली होती. 

न्यायालयीन कोठडीत रवानगी केल्यानंतर जेनिटो कार्देझने जामिनासाठी अर्ज केला होता. जेनिटोचा जामीन अर्ज वारंवार फेटाळण्यात आला होता. रामा यांनी देखील त्याला जामीन मिळाला नाही पाहिजे अशी अर्जव न्यायालयासमोर मांडली होती. दरम्यान, अखेर जेनिटोला अटी - शर्तीवर जामीन मिळाला असून, जवळपास अडीच महिन्यानंतर जेनिटो तुरुंगातून बाहेर येणार आहे.

पूर्ववैमन्यातून मुख्य संशयित जेनिटोने रामा काणकोणकर यांच्यावर झालेल्या हल्ला केल्याचा संशय व्यक्त केला जात आहे.  याप्रकरणाला राजकीय किनार असल्याचे देखील सांगितले जाते. दरम्यान, जेनिटो हाच या हल्लाचा मास्टरमाईंड असल्याचा संशय आहे. काणकोणकर यांना करंझाळे येथे अंगावर शेण फेकून बेदम मारहाण केली होती. यात रामा गंभीर जखमी झाले होते.