पणजी: रामा काणकोणकर यांच्या पत्नीने काही माध्यमांवर अफवा पसरवल्याचा आणि विषय वळवित असल्याचा आरोप करताना स्पष्ट केले की, रामा मानसिकदृष्ट्या चांगल्या अवस्थेत नाही. काही माध्यमांनी तो जबानी देत नाही अशी बातमी करून रामा काणकोणकर यांच्यावर दोष देण्याचा प्रयत्न केला. खरेच पोलिस आणि डॉक्टरांनी माहिती दिली असेल तर त्या डॉक्टर आणि पोलिसांचे नाव जाहीर करावे असे आव्हान त्यांनी माध्यमांना दिले.

दरम्यान, हा विषय दुसरीकडे वळविण्यासाठी माध्यमांची मदत घेतली जाते का, असा प्रश्न अशा घडामोडीमुळे निर्माण होतो, असे देखील त्यांनी म्हटले.

रामा काणकोणकर हल्ला प्रकरणातील चौकशीची दिशा आणि गेल्या आठवडाभरात कोणतीही अधिकृत माहिती न मिळाल्याच्या पार्श्वभूमीवर सामाजिक कार्यकर्त्यांनी थेट तपास अधिकाऱ्याशी भेट घेऊन परिस्थितीची चौकशी केली. यावेळी रामा काणकोणकर यांच्या पत्नी देखील उपस्थित होत्या.

गोमेकॉच्या वैद्यकीय अधीक्षकांनीदेखील रामा काणकोणकर सध्या ‘मेंटली फिट नाही’ असे सांगितले असल्याचे रामा काणकोणकर यांच्या पत्नीने स्पष्ट केले. तरीही काणकोणकर जबानी देत नाही, असे सोशल मीडियासह काही वृत्तपत्रांत प्रसिद्ध होणे हे लोकांचे लक्ष चुकविण्याचा प्रयत्न असल्याचे सामाजिक कार्यकर्त्यांचे म्हणणे आहे.

लोकांचे लक्ष वळविण्याचा प्रयत्न

सध्या रामा काणकोणकर यांच्यावर उपचार सुरू असून त्यांची प्रकृती सुधारण्याच्या प्रक्रियेत आहे. जेव्हा वैद्यकीय अधिकारी स्वतः सांगत आहेत की, काणकोणकर मानसिकदृष्ट्या ठीक नाही, तेव्हा त्यांची जबानी दिली जात नाही असे कसे म्हणता येईल? उलटपक्षी अशा बातम्या लोकांचे लक्ष वळविण्याचे काम करत आहेत, असे काणकोणकर यांच्या पत्नी रती काणकोणकर यांनी सांगितले.