Aadhar Card : मडगाव, रुमडामळ-हाऊसिंग बोर्ड येथे नेपाळी नागरिकांना चार ते पाच हजार रुपये आकारून आधार कार्ड तयार करून दिले जाते, अशा आशयाचा व्‍हिडिओ व्‍हायरल झाल्‍यानंतर सगळीकडे एकच खळबळ माजली आहे.

राजू नेपाळी नावाचा एक एजंट या बेकायदेशीर व्यवहारामध्ये सक्रिय असून तोच या नेपाळी नागरिकांना घेऊन मडगावमध्ये येऊन ही आधार कार्ड करून घेतो, अशी माहिती उपलब्ध झाली आहे.

राजू नेपाळी याचे नाव मी पोलिसांना दिले आहे. पोलिसांनी त्यासंदर्भात कसून चौकशी करावी, अशी मागणी या गोष्टीचा पर्दाफाश करणारे मडगावचे नगरसेवक महेश आमोणकर यांनी केली. हा राजू नेपाळी उत्तर गोव्यात राहात असल्याची माहितीही मिळाली आहे. यासंदर्भात मायणा-कुडतरी पोलिसांनी चौकशीही सुरू केली आहे.

मात्र, त्‍यांच्‍याताला फारसे काही धागेदोरे लागलेले नाहीत.

नगरसेवक आमोणकर यांनी जो व्‍हिडिओ पोलिसांना दिला, त्‍यात दोन इसम आपण आधार कार्ड बनवून घेण्‍यासाठी आलो आहोत आणि आमच्‍याकडून चार हजार रुपये वसूल केले, असे सांगताना दिसतात.

हे दोन्‍ही इसम आपण नेपाळचे नागरिक असल्‍याचे सांगतात. हे दोन इसम कोण, त्‍याचा आम्‍ही शोध घेत आहोत. ते इसम हाती लागले तर त्‍यांना रुमडामळ येेथे कुणी आणले आणि त्‍यांच्‍याकडून कुणी पैसे घेतले, याची माहिती मिळू शकेल, असे पोलिस निरीक्षक देसाई यांनी सांगितले.

गैरप्रकाराबाबत ऑपरेटर अनभिज्ञ

पोलिस निरीक्षक अरुण गावस देसाई यांना यासंदर्भात विचारले असता, ज्‍या आधार कार्ड केंद्र ऑपरेटरच्‍या विरोधात हा आरोप होत आहे, त्या महिलेला आज पोलिस स्‍थानकात बोलावून आम्‍ही चौकशी केली.

मात्र, ती ऑपरेटर सांख्‍यिकी खात्‍याने नेमलेली अधिकृत ऑपरेटर असून आपल्‍या कार्यालयाच्‍या बाहेर जर कुणी काही सांगितले असेल, तर मला त्‍याची काहीच माहिती नाही, असे तिने पोलिसांना सांगितले.

माहिती न जुळल्यास कार्ड अशक्य

आधार कार्ड बारकोड स्‍कॅनिंग करून तयार करावे लागते. त्‍यामुळे कुणीही बनावट दाखले घेऊन आल्‍यास आधार कार्ड केंद्राच्‍या सिस्‍टमप्रमाणे माहिती न जुळल्‍यास आधार कार्ड तयार होतच नाही, अशी माहिती त्‍या ऑपरेटरने पोलिसांना दिली.