Goa Rain: गोव्यातील साखळी, डिचोली, सत्तरी भागात जोरदार पावसाला सुरवात झाली आहे. भारतीय हवामान विभागाने (आयएमडी) याआधीच गोव्यात यलो अलर्ट जारी केला होता. वाळपई परिसराला पावसाने जोरदार तडाखा दिला असून येथे सर्वत्र पाणी साचले आहे. मुसळधार पावसाने जनजीवन विस्कळीत झाले.

सायंकाळी चारच्या सुमारास ढग भरून आले आणि वेगाने वारे वाहण्यास सुरवात झाली. त्यानंतर गोव्यातील वरील भागांमध्ये जोरदार पावसाला सुरवात झाली. जोरदार पावसामुळे अनेकांची तारांबळ उडाली. तथापि, उकाड्याच्या पार्श्वभुमीवर आलेल्या पावसाच्या जोरदार सरींमुळे वातावरणात आल्हाददायक गारवा निर्माण झाला होता. दरम्यान, गोव्यात इतरत्र ढगांमुळे अंधारून आले होते. पणजीसह आसपासच्या परिसरात पावसाची शक्यता आहे. काही ठिकाणी वीजांचा कडकडाटासह पाऊस झाला.

भारतीय हवामान विभागाने दक्षिण भारतातील कर्नाटक आणि तमिळनाडू या राज्यांना आगामी पाच दिवसात जोरदार पावसाची शक्यता वर्तवली आहे. दोन्ही राज्यांना आयएमडीने यलो अलर्ट जारी केलेला आहे.

हवामान विभागाने गोव्यासह अरुणाचल प्रदेश, आसम, छत्तीसगड, आंध्र प्रदेश, तेलंगणा, कर्नाटक, केरळ, तामिळनाडु आणि अंदमान-निकोबार बेटांवर पावसाची शक्यता वर्तवली होती. देशात अनेक ठिकाणी परतीच्या पावसाला सुरवात झाली आहे. त्यामुळे पुर्वेकडील राज्यात पावसाचा जोर ओसरण्याची शक्यता आहे.