मडगाव: सोनारवाडा सातेमळ-राय येथे ओडिशाच्या खगेश्वर साबर या व्यक्तीचा खून झाल्याची घटना रविवारी उघडकीस आली. याप्रकरणातील फरार दुसऱ्या संशयिताला देखील मायणा कुडतरी पोलिसांनी अटक केली आहे. दारुच्या नशेत ही घटना घडल्याचे प्राथमिक तपास समोर आले आहे.

मायणा-कुडतरी पोलिसांनी सुरुवातीला सशिबंत बिभीषण मांझी ऊर्फ लंबू (वय ४२ वर्षे) याला अटक केली होती. दरम्यान, आता दुसरा संशयित रबी माझी (वय २८ वर्षे) यालाही अटक करण्यात आली आहे. तिघेजण खोलीत दारू पीत बसले होते. दारुच्या नशेत त्यांच्यात शाब्दिक चकमक झाली. यातच खगेश्वर याच्यावर हल्ला केल्याने त्याच मृत्यू झाल्याचे सांगितले जाते.

शनिवारी रात्री ही घटना घडल्याचे तपासात समोर आले आहे. खोलीतून बाहेर आलेल्या रक्तामुळे शेजाऱ्यांना काहीतरी अनुचित घडल्याचे समजले. पोलिसांना याची माहिती मिळताच पोलिसांनी घटनास्थळी दाखल होत पंचनामा केला. दारुच्या नशेतच ही घटना घडल्याची शक्यता वर्तवली जात असून, यातच खगेश्वर साबर याचा मृत्यू झाला, अशी माहिती मिळाली आहे.

दरम्यान, या घटनेनंतर संशयित लंबू आणि रबी पलायन करण्याच्या तयारीत होते. त्यानुसार पोलिसांनी दोघांचा शोध घेण्यासाठी पथके रवाना केली. पोलिसांनी लंबू याला मडगाव रेल्वे स्थानक परिसरातून अटक केली तर रबी याला बांबोळी परिसरातून अटक केली. दोघांचीही पोलिस कोठडीत रवानगी करण्यात आली आहे.