पुणे: ‘‘भारतीय महिला ही या देशाची सर्वांत मोठी ताकद आहे. मात्र, त्यांना घाबरवून नियंत्रणात ठेवण्याचा प्रयत्न करणारी पुरुषसत्ताक व्यवस्था आणि ‘मनुस्मृती’ची बुरसटलेली विचारधारा आता मुळासकट उखडून फेका,’’ असा घणाघात करत लोकसभेचे विरोधी पक्षनेते राहुल गांधी यांनी भाजप आणि राष्ट्रीय स्वयंसेवक संघावर थेट हल्लाबोल केला.

महिलांना कायम पिंजऱ्यात डांबून ठेवणारा ‘हिंदुस्थान’ आम्हाला अजिबात नको,’ अशा शब्दांत खडसावून सांगितले.पुण्यातील ‘एआयएसएसएमएस’ महाविद्यालयात राहुल गांधी यांनी काँग्रेसच्या ‘छात्रों की गुंज’ या कार्यक्रमात विद्यार्थिनी आणि तरुणींशी संवाद साधला. त्यांनी काही तरुणींना बोलावून त्यांचे अनुभवही ऐकून घेतले.

‘...तर मी तुमच्यासोबत बसेन’

आदिवासी समाजातील एका तरुणीने वसतिगृहातील सुविधा, शिक्षण आणि सुरक्षेशी संबंधित प्रश्न मांडल्यानंतर “मला तिथे बोलवा, मी तुमच्यासोबत येऊन बसेन,” असे आश्वासन राहुल गांधी यांनी दिले. आदिवासी विद्यार्थी विविध मागण्यांसाठी १० दिवसांपासून पुण्यात उपोषण करत आहेत. दोन तरुणीही या आंदोलनात सहभागी असून, त्यापैकी एका तरुणीची प्रकृती खालावली आहे.