सासष्टी: केळशी पंचायतीने स्थानिक महिला स्वयंसेवी गटांना चांगली संधी मिळवून देण्यासाठी एका अभिनव अशा उपक्रमाची सुरवात केली असून केळशी समुद्र किनाऱ्यावर दिवाळी बाजाराचे आयोजन केले आहे. या दिवाळी बाजाराचे उद्‍घाटन केळशीचे सरपंच डिक्सन वाझ यांच्या हस्ते करण्यात आले.

या प्रसंगी बोलताना सरपंच वाझ यांनी सांगितले, की महिला या कुटुंबाचा अत्यंत महत्वाचा घटक असतात. महिलांकडे चांगली प्रतिभा, कौशल्य असते. मात्र त्यांना संधी मिळत नसते. केळशी पंचायती तर्फे स्थानिक पाच महिला स्वयंसेवी गटांच्या सहकार्याने या दिवाळी बाजाराचे आयोजन करण्यात आले आहे.

त्यांची उत्पादने विक्रीची संधी पंचायतीतर्फे देण्यात येत आहे. या किनाऱ्यावर हजारो पर्यंटक असतात, शिवाय स्थानिक लोकही असतात. त्यामुळे त्यांच्या उत्पादनाला मागणी मिळणार आहे.

शिवाय हा बाजार दर शुक्रवार, शनिवार व रविवारी भरविण्यात येणार आहे, नाताळच्या वेळीही या महिलांना फायदा मिळणार आहे, असे वाझ यांनी सांगितले. या स्वयंसेवी महिला गटांतील प्रतिनिधींनी सरपंच डिक्सन वाझ यांचे आभार मानले आहेत.