Calangute Goa

गुगल मॅपवर बऱ्याचवेळा लोकेशन अपडेट नसल्याने अनोळखी ठिकाणी एखाद्याची फसगत होऊ शकते. अशीच एक घटना गोव्यातून समोर आली आहे. एक पुणेकर गोव्यात गेला असता त्याची गुगल मॅपमुळे चांगलीच पंचायत झाली शिवाय त्याला दंड देखील भरावा लागला.

पोलिसांनी दिलेल्या माहितीनुसार, संदीप दाभाडे या पुण्यातील व्यक्तीवर दंडात्मक कारवाई करण्यात आली आहे. संदीप त्याची कार MH14 HK 0191 कळंगुट समुद्रकिनाऱ्यावरुन घेऊन गेला आणि बीचवरील रेतीत त्याची कार रुतून पडली.

समुद्रकिनाऱ्यावरील चालस्टन बीच रिसॉर्टजवळ रात्री साडे आठच्या सुमारास ही घटना घडली. कळंगुट पोलिस घटनास्थळी दाखल झाले व कारचालक संदीप विरोधात दंडात्मक कारवाई केली. गोव्यात समुद्रकिनाऱ्यावर वाहन घेऊन जाण्यास बंदी आहे.

पण, समोर आलेल्या माहितीनुसार, संदीप यांचा हा घोळ गुगल मॅपमुळे झाल्याचे समोर आले आहे. संदीप गुगल मॅपने दाखवलेला रस्ता फॉलो करत असताना चुकून कळंगुट बीचवर येऊन अडकले.

दरम्यान, या परिसरात गस्तीवर असलेल्या सर्वेश नार्वेकर यांना एक अनोळखी कार बीचवर दिसल्याने त्यांनी संबधित व्यक्तीविरोधात कारवाई केली.