जुने गोवा येथील बेकायदेशीर बंगला पाडण्याप्रश्नी राज्य सरकारच्या भूमिकेचा निषेध करण्यासाठी तसेच केंद्र सरकारचे लक्ष त्याकडे वेधण्यासाठी आज गोव्यातील पर्यावरणप्रेमींनी दिल्ली येथे आंदोलन छेडले.

आज सकाळी जंतरमंतर येथे या आंदोलनाला सुरुवात झाली. यावेळी आम आदमी पक्षाच्या नेत्या प्रतिमा कुतिन्हो, पर्यावरणप्रेमी शंकर पोळजी, सय्यद इम्तियाज, अॅथनी डिसिल्वा, ग्लेन काब्राल आदी उपस्थित होते. जुने गोवे येथील वारसास्थळात असलेला हा बेकायदेशीर बंगला त्वरित पाडावा अशी मागणी यावेळी पर्यावरणप्रेमींनी केंद्र सरकारला केली.

जुने गोवे येथील सेंट कॅजिटन चॅपेलजवळील संरक्षित जागेत हा बेकायदेशीर बंगला उभारण्यात आलेला आहे. संरक्षित स्थळी उभारण्यात आलेल्या या बेकायदेशीर बंगल्याच्या प्रश्‍नावरून गोव्यात मोठे आंदोलनही छेडण्यात आले.

राज्यातील प्रमुख विरोधी पक्ष कॉंग्रेससह आप, तृणमूल कॉंग्रेस, गोवा फॉरवर्ड आणि रिव्होल्युशनरी गोवन्स या राजकीय पक्षांनी या आंदोलनात भाग घेतला होता. स्वयंसेवी संस्था आणि नागरिकांनीही आवाज उठवला होता.