पणजी: रुग्णांकडून व त्यांच्या नातेवाईकांकडून उपचारासंदर्भात निष्काळजीपणाचा ठपका ठेवून होत असलेल्या सतावणुकीचा व दाखल केल्या जाणाऱ्या तक्रारींचा आज इंडियन मेडिकल असोसिएशन (आयएमए) गोवा विभागातर्फे येथील जुन्या गोमेकॉ इस्पितळाजवळ निषेध करत निदर्शने केली.

त्यानंतर आयएमएने मुख्यमंत्र्यांची भेट घेऊन याप्रकरणांची दखल सरकारने घेण्याची मागणी निवेदनाद्वारे केली.हुशार महिला डॉक्टरावर उपचारादरम्यान झालेल्या कथित निष्काळजीपणाचा ठपका ठेवून तिच्यावर खुनाचा गुन्हा पोलिसांनी दाखल केला होता. या गुन्ह्यामुळे महिला डॉक्टर तणावाखाली होती. त्यानंतर तिने टोकाची भूमिका घेत आत्महत्या केली होती. या घटनेमुळे देशात डॉक्टरांमध्ये संतापाची लाट उसळली.

डॉक्टर हे रुग्णांची सेवा करतात तरीही रुग्णाचा मृत्यू झाल्यास त्याचा दोष डॉक्टरावर ठेवला जातो. पोलिस यंत्रणाही घटनेची कोणतीच शहानिशा न करता किंवा खातरजमा न करता कोणाच्या तरी सांगण्यावरून डॉक्टरांविरुद्ध तक्रारी दाखल केल्या जातात. अशा प्रकरणांना आळा न बसल्यास डॉक्टारांकडून उपचार होऊनही नाहक सतावणुकीला सामोरे जावे लागते म्हणून डॉक्टर किचकट ऑपरेशनसाठी पुढे येणार नाही. त्यामुळे सरकारने या संदर्भात गोवा मेडिकेअर सर्व्हिस पर्सनल व मेडिकेअर सर्व्हिस इन्स्टिट्युशन्स कायदा २०१३ नुसार समिती स्थापन करण्याची मागणी आयएमएने केली. आयएमएतर्फे आयोजित करण्यात आलेल्या या निषेध व निदर्शनाच्या कार्यक्रमामध्ये अध्यक्ष डॉ. रुफिन मोंतेरो, डॉ. शेखर साळकर इतर डॉक्टर्स उपस्थित होते.