Progressive Truck Owners Association demands financial assistance from cm pramod sawant

सासष्टी: मुख्यमंत्री डॉ. प्रमोद सावंत यांनी गोव्यात खाण उद्योग सुरू होईल असे जाहीर करून गेली अनेक वर्षे वापराविना पडून राहिलेले ट्रक रस्त्यांवर धावताना दिसू लागतील असे म्हटले होते. मात्र, तत्पूर्वी पडून राहिलेले ट्रक दुरुस्ती करण्याचे मोठे आव्हान ट्रकमालकांवर आहे. हल्लीच दक्षिण गोवा प्रोग्रेसिव्ह ट्रकमालक असोसिएशनच्या पदाधिकाऱ्यांनी मुख्यमंत्री डॉ. प्रमोद सावंत यांची भेट घेऊन ट्रकमालकांना आर्थिक मदतीची मागणी केली.

पत्रकारांकडे बोलताना असोसिएशनच्या पदाधिकाऱ्यांनी सांगितले, की खाण उद्योग सुरू होणार याचा आम्हाला संशयच आहे. खाण उद्योग आज ना उद्या सुरू होणार यासाठी ट्रकमालक प्रत्येक वर्षी ट्रक दुरुस्तीवर लाखो रुपये खर्च करीत आहेत. सरकारवर विश्र्वासून आम्ही ट्रकांची दुरुस्ती करीत असतो. आता मात्र ट्रक दुरुस्तीवर आणखी पैसे खर्च करण्याची ताकद आमच्यात राहिलेली नाही.

ट्रकसाठी आम्ही जो वर्षभरात कर भरतो, तोसुद्धा रद्द करावा अशी आमची मागणी आहे. खाण उद्योग सुरू करणार हे सरकारने स्पष्ट करावे. जर सरकार खाण उद्योग सरू करीत नसेल, तर आम्ही आमचे ट्रक विकून टाकू व सरकारने आम्हाला पर्याय द्यावा, असेही या असोसिएशनच्या पदाधिकाऱ्यांनी सांगितले.

‘ट्रक दुरुस्तीसाठी दीड लाख द्या’

जर सरकार खरोखरच खाण उद्योग सुरू करीत असेल, तर प्रत्येक ट्रकमागे दुरुस्तीसाठी सरकारने कमीत कमी एक ते दीड लाख रुपये आर्थिक मदत आम्हाला द्यावी अशी आमची मागणी आहे. एकदा का ट्रक कामाला लागले की त्यातून ही रक्कम सरकारने वसुल करावी असा आमचा प्रस्ताव असल्याचेही या पदाधिकाऱ्यांनी सांगितले.