मातृभाषेतून प्राथमिक शिक्षण घेतल्यास मुलांवर चांगले संस्कार होतात, शिवाय मुलांचा बौद्धिक विकासही उत्तम होतो. मुलांनी पुस्तकी ज्ञानापेक्षा व्यावसायिक व निसर्गाचे ज्ञान आत्मसात करणेही गरजेचे आहे. अभ्यासाबरोबरच मुलांनी आपले आरोग्यही सुदृढ व सक्षम करण्यासाठी खेळालाही महत्त्व द्यावे, असे प्रतिपादन मंत्री गोविंद गावडे यांनी सावईवेऱ्यात केले.

वेरे - वाघुर्मे ग्रामपंचायतीतर्फे आयोजित सावईवेरे पंचक्रोशीतील सर्व सरकारी प्राथमिक विद्यालयांतील विद्यार्थ्यांना गणवेश वाटप तसेच विद्यार्थ्यांच्या गौरव सोहळ्यात ते बोलत होते. व्यासपीठावर गट विकास अधिकारी आश्विन देसाई, सरपंच शोभा पेरणी, उपसरपंच बाबू गावडे, पंच सदस्य स्वाती पालकर, लोचन नाईक, रोहन तारी, नवनाथ वेलकासकर, अक्षय नाईक उपस्थित होते.

शोभा पेरणी म्हणाल्या, मुलांवर चांगले संस्कार करणे, पालकांची तसेच शिक्षकांची जबाबदारी आहे. मुलांमध्ये वाचन व शिस्त लावावी.

सत्यवान शिलकर यांनी प्रास्ताविक केले. स. प्रा. वि. घाणो - सावई, स. प्रा. वि. भाटोळे - सावई, स. प्रा. वि. पाली, स. प्रा. वि. सडा - सावईवेरे, स. प्रा. वि. कावंगाळ व स. प्रा. वि. वाघुर्मे या विद्यार्थ्यांना गणवेश देण्यात आले. मधलावाडा, वेलकास, वाघुर्मे, सावई या अंगणवाडी व बालवाडीतील मुलांना पंचायतीतर्फे खेळणी प्रदान करण्यात आली.

दहावीतील 90 टक्के पेक्षा जास्त गुण मिळविलेल्या भाविका खेडेकर, दुर्वा शेट वेरेकर, आचल गिरोडकर, विस्मया गावडे या चार विद्यार्थ्यांचा गौरव करण्यात आला.

सूत्रनिवेदन सत्यवान शिलकर यांनी केले तर उपसरपंच बाबू गावडे यांनी आभार मानले.

चरित्रांतून प्रेरणा घ्या!

मंत्री गावडे पुढे म्हणाले, मुलांनी छत्रपती शिवाजी महाराज, डॉ. बाबासाहेब आंबेडकर, स्वामी विवेकानंद इत्यादी भारतीय महान व्यक्तिमत्त्वाचा अभ्यास करावा, त्यांचे चरित्र वाचावे. त्यांच्या चरित्रांतून प्रेरणा घ्यावी. त्यांचे कष्ट, परिश्रम आणि त्याग मोठा आहे.