Premanand Naik Fast Bhutani Infra Project Sancoale

वास्को: मी उपोषणाला बसल्यापासून सरकारच्या विविध विभागातून माझ्यावर उपोषण सोडण्यासाठी दबाव टाकण्यात येत आहे. तसेच प्रसारमाध्यमांवर जुना व्हिडिओ दाखवून माझे नाव बदनाम करण्याचे षड्‌यंत्र सांकवाळ पंचायतीच्या सत्ताधारी पंचसदस्यांसमवेत काही माजी पंचसदस्य करीत असल्याची माहिती प्रेमानंद नाईक यांनी दिली.

जोपर्यंत सरकारने दिलेले भूतानी इन्फ्रा प्रकल्पाचे सर्व परवाने रद्द केले जात नाहीत, तोपर्यंत माझे उपोषण सुरूच राहणार असल्याचे प्रेमानंद नाईक यांनी सांगितले. सांकवाळ-सावळफोंड गावात येणाऱ्या भूतानी इन्फ्रा प्रकल्पाविरोधात नाईक यांचा सोमवार (ता.२८) हा उपोषणाचा आठवा दिवस ठरला.

सांकवाळ पंचायत क्षेत्रातील सावळफोंड गावात प्रमेश कन्ट्रक्शनचा ‘भूतानी इन्फ्रा’ प्रकल्प उभारण्यात येणार असून, हा प्रकल्प आल्यास याचा परिणाम संपूर्ण मुरगाव तालुक्याला भोगावा लागणार आहे. राज्य सरकारच्या शहर आणि नियोजन विभाग, मुरगाव नियोजन विकास प्राधिकरण व सांकवाळ पंचायतीमार्फत भूतानी इन्फ्रा प्रकल्प उभारण्यासाठी परवाने मंजूर केले आहेत.

या प्रकल्पाविषयी माहिती मिळताच स्थानिकांसमवेत कुठ्ठाळीचे आमदार आंतोन वाझ, खासदार कॅ. विरियातो फर्नांडिस यांनी प्रकल्पाला विरोध दर्शविला. त्यानंतर या प्रकल्पाला दिलेले सर्व परवाने रद्द करावेत या मागणीसाठी माजी सरपंच प्रेमानंद नाईक यांनी सांकवाळ पंचायतीसमोर उपोषण सुरू केले.

चोवीस तास पोलिस बंदोबस्त

प्रेमानंद नाईक यांच्या उपोषणाचा सोमवार हा आठवा दिवस ठरला. त्यांना समर्थन देण्यासाठी सांकवाळवासीयांसमवेत गोव्यातील विविध भागांतील नागरिक येत आहेत. सोमवारी प्रेमानंद नाईक यांची कुठ्ठाळी प्राथमिक आरोग्य केंद्राच्या डॉक्टरांनी तपासणी केली. नाईक यांची तब्येत दिवसेंदिवस खालावत असल्याने डॉक्टर त्यांच्यावर नजर ठेवून आहेत. तसेच उपोषणाच्या ठिकाणी चोवीस तास पोलिस बंदोबस्त ठेवण्यात आला आहे.