शिक्षण खात्याचे अप्पर सचिव कविता चौहान यांनी सांगे येथील जमीन IIT प्रकल्पासाठी योग्य नसल्याचे पत्र या शेतकऱ्यांना पाठवले आहे. यावरून सांगेत आयआयटी होणार नाही हे स्पष्ट झाले आहे. सांगे नाहीतर मग कोठे होणार IIT प्रकल्प हा प्रश्न सध्या गोव्यातील नागरिकांना पडला आहे. दरम्यान, याबाबत मुख्यमंत्री प्रमोद सावंत यांना प्रश्न विचारला असता त्यांनी IIT प्रकल्पाबाबत प्रश्नांची उत्तरे दिली आहेत.

आयआयटीसाठी नवी जागा शोधण्याचे काम सुरू केले असल्याचे मुख्यमंत्री प्रमोद सावंत यांनी स्पष्ट केले आहे. पण, आयआयटीची नवी जागा सांगेत असणार की इतर दुसऱ्या ठिकाणी यावर भाष्य करणे मुख्यमंत्र्यांनी टाळले. त्यामुळे गोव्यातील आयआयटी प्रकल्प कोठे होणार याबाबत सस्पेन्स कायम आहे. पण, आयआयटीचा प्रकल्प गोव्यातच होणार याबाबत मुख्यमंत्री सावंत यांनी शाश्वती दिली आहे.

गेल्या अनेक वर्षांपासून आयआयटी गोवासाठी कायमस्वरूपी स्थळ शोधण्यासाठी राज्य सरकारकडून प्रयत्न सुरू आहेत. सांगे, काणकोण, वाळपई आणि पुन्हा सांगे असा प्रवास करणाऱ्या या शिक्षण प्रकल्पासाठी सांगे तालुक्यातील कोटार्ली परिसरातील जमीन राज्य सरकारने स्थानिकांचा विरोध डावलून सीमांकीत करीत तसा अहवाल केंद्राकडे पाठवला होता. याला या भागातील शेतकऱ्यांनी प्रखर विरोध करत आमरण उपोषण चालू ठेवले होते. यासंबंधी नागरिक आणि शेतकऱ्यांचे विविध प्रशासकीय अधिकाऱ्यांना पत्रव्यवहार सुरू होते.

दरम्यान, याबाबतच स्थानिक कार्यकर्ते कोंतान्सियो मास्करेन्हास आणि इतरांनी केंद्र सरकारच्या शिक्षण मंत्रालयाला जमिनीसंदर्भात विचारणा केली होती. यावर शिक्षण खात्याचे अप्पर सचिव कविता चौहान यांनी यासंदर्भातील माहिती देत राज्य सरकारकडून विचारात असलेली आणि सीमांकन करून अहवाल सादर झालेली जमीन या प्रकल्पासाठी योग्य नसल्याचे पत्र या शेतकऱ्यांना पाठवले आहे. यावरून सांगेत आयआयटी होणार नाही हे स्पष्ट झाले आहे.