पणजी: गोवा हे राज्य सर्वात लहान असलं तरी देखील दिवसेंदिवस गुन्ह्यांचं प्रमाण मात्र वाढत चाललंय. पैसे घेऊन सरकारी नोकरी देण्याचं आमिष दाखवून गोव्यातील विविध भागांमधल्या सामान्य जनतेला फसवण्याचा प्रकार सुरु आहे. अँटी करप्शन डे (Anti Corruption Day) च्या निमित्तानेच गोवा फॉरवर्ड पार्टीचे अध्यक्ष विजय सरदेसाई यांनी गोवा सरकारच्या विरोधात टीकास्त्र सोडले आहे.

गोवा सरकार गुन्ह्यांवर पडदा टाकत असून सध्याच्या सत्ताधाऱ्यांच्या कालावधीत दररोज नवनवीन प्रकरणं उघडकीस येत आहे . पैसे घेऊन सरकारी नोकरी देण्याचा प्रकार आता उघड झाला असला तरीही राज्य सरकार मात्र या घोटाळ्यातील प्रमुख आरोपींना वाचवण्याचा किंबहुना त्यांना वाचवण्याचा प्रयत्न करत आहे, असा आरोप त्यांनी केला.

याच्या परिणामी देशासमोर गोव्याचं भलतंच चित्र उभं राहायला सुरुवात झालीये" असा उद्वेग सरदेसाईंनी एका इंग्रजी वृत्तपत्रासमोर व्यक्त केला.

"लोकशाहीचे चार स्तंभ असतात, त्यांना देखील भ्रष्टाचारामुळे अपयशाचा सामना करावा लागतोय, भाजपा सरकारच्या राज्यात प्रत्येक विभाग तडजोड करत वावरतोय आणि हे बरोबर नाही. भावी पिढीसाठी आणि गोव्याला समृद्ध आणि विकसित बनवण्यास गोमंतवासीयांनी एकत्र येण्याची गरज आहे" असं सरदेसाई म्हणालेत.