Mechanized Fishing Gets a Boost from Post-Monsoon Showers In Goa

सासष्टी: ऑक्टोबर संपत आला तरी पाऊस सुरूच आहे. या पावसामुळे शेती लागवडीवर विपरीत परिणाम झाला आहे. मात्र, या पावसाचा लाभ मच्छीमारांना होत आहे. पारंपरिक मच्छीमारांपेक्षा जे यांत्रिकी बोटीने मच्छीमारी करतात त्यांच्यासाठी हा पाऊस वरदानच ठरत आहे. सध्या जोराने पाऊस पडतो खरा; पण समुद्रात त्याचा वारा किंवा समुद्र खवळण्यावर परिणाम झालेला नाही. त्यामुळे बोटी बिनधास्तपणे मच्छीमारी करू शकतात.

बोटमालक असलेले सावियो डिसिल्वा यांनी सांगितले की, पावसाचा काहीच परिणाम मच्छीमारीवर झालेला नाही. पावसामुळे समुद्रात मासळीची पैदास वाढलेली आहे. आम्हाला एका फेरीला तीन ते चार टन मासळी मिळते.

कुटबण मच्छीमार पतसंस्थेचे चेअरमन विनय तारी यांनी सांगितले की, पाऊस हा मच्छीमारीसाठी वरदान मानला जातो. सध्या आम्हाला भरपूर मासळी मिळत आहे. या दिवसांत जास्तीत जास्त प्रमाणात बांगडा जाळ्याला लागतो. मात्र, आम्हाला योग्य किंमत मिळत नाही. मडगावमधील मासळी मार्केटात आम्हाला विक्रीसाठी जागा उपलब्ध नाही. हे मार्केट मध्यस्थांचे आहे. लोकांनाही फॉर्मेलिनयुक्त मासळी खाण्याची सवय जडली आहे. आम्ही संबंधित अधिकारिणीकडे तक्रारी केल्या, आमच्या समस्या मांडल्या; पण त्याचा काहीच उपयोग होत नाही. त्यामुळे आमच्यापुढे एवढी मासळी इतरत्र देण्याव्यतिरिक्त दुसरा पर्याय नाही.

पारंपरिक मच्छीमारीवर संकट!

पारंपरिक मच्छीमार पेले फर्नांडिस यांच्या म्हणण्याप्रमाणे, आम्हाला मासळी मिळते; पण जेवढी मिळायला हवी तेवढी मिळत नाही. एरव्ही पावसाळ्यात आम्हाला मासळी जास्त मिळायला हवी होती. पण यांत्रिकी बोटींमुळे आम्ही कमी पडतो. हे बोटमालक आमच्यासारख्या पारंपरिक मच्छीमारांना जगू देत नाहीत. गोव्याच्या किनारपट्टीवर अडीच लाख पारंपरिक मच्छीमार आहेत. त्यांचा उदरनिर्वाह हा एक मोठा प्रश्न आहे.