पणजी: पर्वरी उड्डाणपुलासाठी एलिव्हेटेड कॉरिडॉर उभारण्यासाठी ‘ओ-कोकेरो चौक ते मॉल द गोवा’पर्यंतचा रस्‍ता आजपासून पाच महिने बंद राहणार होता; परंतु निर्णयात बदल झाला असून गणेश चतुर्थीनंतर तो बंद करण्‍यात येईल. त्‍यासंदर्भात नवी तारीख जाहीर करण्‍यात येईल, अशी माहिती मिळाली आहे.

नियमित मार्ग बंद केल्‍यानंतर प्रवाशांना बी. बी. बोरकर रस्तामार्गे शिवाजी जंक्शन (मॉल दि गोवा मागे) वाहतूक करावी लागणार आहे. पावसाने विश्रांती घेतल्‍यानंतर पर्वरी परिसरात मार्गावर उडणारी पांढरी भुकटी प्रचंड धोकादायक ठरत आहे. रहिवाशांनी ओ-कोकेरो ते एससीईआरटी भागापर्यंतच्या रस्त्याला ‘गुदमरवणारे दुःस्वप्न’ असे संबोधायला सुरुवात केली आहे.

अनेकांनी या परिसराला ‘डेथ ट्रॅप’ अशीही उपमा दिली आहे. दरम्यान, आम आदमी पक्षाच्या पदाधिकाऱ्यांनी या मार्गावरून दुचाकी फेरी काढून मंत्र्यांनी दुचाकीवरून प्रवास करून पाहावा असे चक्क आव्हान देखील दिले आहे. एकूण ५.१५ कि.मी.च्या सहा लेनच्या या करिडॉर प्रकल्पाच्या कामामुळे वाहतुकीचा गोंधळ सुरुवातीपासूनच सुरू आहे. सध्या या प्रकल्पाचे केवळ ३० टक्के काम पूर्ण झाले असल्याचे खात्याकडून सांगण्यात येते.

मे महिन्यात प्रीकास्ट सेगमेंट कोसळल्याची घटना घडल्याने प्रकल्प पूर्ण करण्यास एप्रिल २०२६ मधील मूळ मुदत वाढवून जून २०२६ करण्यात ०आली आहे. आता अंतिम मुदत ऑक्टोबर २०२६ पर्यंत वाढविण्यात आली आहे.