पणजी: पर्वरी येथे सुरू असलेल्या उड्डाणपुलाचे काम जलदगतीने सुरू असून लवकरच दिलेल्या वेळेआधी उड्डाणपुलाचा लाभ नागरिकांना मिळणार असे दिसून येत आहे. प्रकल्पाचे विविध टप्पे जवळपास पूर्णत्वास येत असून उर्वरित कामेही नियोजित वेळेत पूर्ण होणार असल्याचा विश्वास सार्वजनिक बांधकाम खात्याने व्यक्त केला आहे.

सार्वजनिक बांधकाम खात्याचे कार्यकारी अभियंता ज्यूड कार्व्हालो यांनी दिलेल्या माहितीनुसार, ८८ खांबांपैकी ८२ खांब उभारण्यात आले आहेत, तर इतर सर्व कामे जलदगतीने सुरू आहे.

या प्रकल्पांतर्गत एकूण ५३० पाईल्सचे काम पूर्ण झाले असून, सर्व पाइल कॅप्सही (८८ पैकी ८८) पूर्ण झाल्या आहेत. एकूण ८८ खांब उड्डाणपुलासाठी उभारण्यात येणार असून सध्या ८२ खांब उभारून काम पूर्ण झाले आहे.

एकंदरीत खांब उभारणीचे ९४ टक्के काम पूर्ण झाले आहे, तर ८८ पैकी ८२ खांब कॅप्सही पूर्णत्वास आल्या आहेत. सेगमेंट कास्टिंगच्या एकूण १४३१ भागांपैकी ३७६ सेगमेंट्सचे कास्टिंग पूर्ण झाले असून हे अंदाजे २७ टक्के काम पूर्ण झाले आहे. तसेच एकूण ८७ स्पॅनपैकी १३ स्पॅन्सचे काम झाले असून सुमारे १५ टक्के काम पूर्ण झाले आहे, अशी माहिती विभागातर्फे देण्यात आली आहे.

पूर्ण झालेले काम

पाईल्स – ५३० पैकी ५३० पूर्ण (१००%)

पाइल कॅप्स – ८८ पैकी ८८ पूर्ण (१००%)

खांब – ८८ पैकी ८२ पूर्ण (९४%)

खांब कॅप्स – ८८ पैकी ८२ पूर्ण (९४%)

सेगमेंट कास्टिंग – १४३१ पैकी ३७६ पूर्ण (२७%)

स्पॅन्स लॉन्चिंग – ८७ पैकी १३ पूर्ण (१५%)